Memleket basshysynyń tapsyrmasyna sáıkes, kólik prokýratýrasy jáne basqa da quqyq qorǵaý organdary esirtki bıznesine qarsy kúresti, shekarada júkter men poshta jóneltilimderin baqylaýdy kúsheıtti, shetelden elimizge esirtkiniń zańsyz ákelinýin boldyrmaý maqsatynda sharalar qabyldady, dep habarlaıdy aqshamnews.kz.
Tek 2024 jyldyń ózinde zańsyz aınalymnan 1 tonnadan astam esirtki zattary tárkilendi, onyń ishinde 774 kg geroın, 155 kg marıhýana, 37 kg gashısh jáne gashısh maıy, 34 kg kóknár, sondaı-aq 1 kg sıntetıkalyq esirtki bar. Tárkilengen zattardyń «qara naryqtaǵy» quny 7 mıllıard teńgeden astam dep baǵalanyp otyr.
Irannan geroınniń iri partıasyn ákelýdiń joly kesildi, ony qylmystyq top turmystyq taýarlar retinde jasyrýǵa tyrysqan bolatyn.
Sonymen qatar, Eýropa, AQSH jáne Taılandtan kelgen esirtki zattary bar 50-den astam poshta joldanymdary ustaldy.
Mysaly, Qarjylyq monıtorıń agenttigi AQSH-tan esirtki zattaryn poshta arqyly kontrabandalyq jolmen jetkizetin júıeli arnany joıdy.
Nátıjesinde on kúdikti ýaqytsha ustaý ızolátoryna qamalyp, 15 kg kannabıs syǵyndysy jáne 8 kg marıhýana tárkilendi.
21 sottalýshy túrmege qamaldy, arasynda shetel azamattary da bar.
Memleket esirtkiniń zańsyz aınalymyn toqtatý jumysyn jalǵastyryp, baqylaý sharalaryn kúsheıtip, halyqaralyq seriktestermen yntymaqtastyqty arttyrýda.