Almatydaǵy iri esirtki zerthanasynyń uıymdastyrýshysy 11 jylǵa bas bostandyǵynan aıyryldy, dep habarlaıdy almaty-akshamy.kz Polisia.kz-ke silteme jasap.
2020 jyldyń tamyz aıynda Naýryzbaı aýdanynyń aýmaǵynda ornalasqan baý-baqsha qoǵamdastyǵynyń birinde esirtki zerthanasy anyqtaldy.
– Esirtki zerthanasyna aınaldyrylǵan úıdiń ishinde sıntetıkalyq preparatty shyǵarýǵa arnalǵan túrli kolbalar men arnaıy qondyrǵylar tabyldy jáne tárkilendi. Sondaı-aq daıyn ónim – “mefedron” psıhotropty zattary men asa aýqymdy kólemde a-PVP tárkilendi, – dedi Almaty qalasy PD tergeý basqarmasy bastyǵynyń orynbasary Ádil Salaev.
Belgili bolǵandaı, sıntetıkalyq esirtki óndirisi úshin qoldanylatyn zattar men zerthanalyq qondyrǵylardan turatyn júktiń Almatydaǵy kólik-logıstıkalyq kompanıalardyń birine jetkizilýi polısıanyń nazaryn aýdartty. “Júktiń” tapsyrys berýshisi 45 jastaǵy K.esimdi er adam bolyp shyqty.
Júrgizilgen arnaıy is-sharalar onyń zańsyz áreketin jáne esirtki zerthanasyn anyqtady. Er adam ustaldy jáne sot ony QR QK-niń 297-baby 3-bóligi 3-tarmaǵy (Asa iri kólemde psıhotroptyq zatty satý maqsatynda zańsyz daıyndaý jáne saqtaý) boıynsha qylmystyq quqyq buzýshylyq jasaǵany úshin kináli dep tanydy. Ol 11 jylǵa bas bostandyǵynan aıyryldy.