Festıvál qonaqtary Qazaqstannyń úzdik anımasıalyq kınostýdıalarynyń kórmesin tamashalaıdy.
Dástúrli Halyqaralyq ÁMEN anımasıalyq fılmder kınofestıvali (ÁMEN International Animation film festival) 29-30 qazan kúnderi Túrkistan qalasynda ótedi, dep habarlaıdy almaty-akshamy.kz QR Aqparat jáne qoǵamdyq damý mınıstrligine silteme jasap.
Bıyl úshinshi ret uıymdastyrylatyn halyqaralyq sharaǵa otandyq jáne baýyrlas túrki, ortaazıalyq elderdiń, atap aıtqanda Túrkıa, Ázerbaıjan, Qyrǵyzstan, Ózbekstan, Tájikstan, sondaı-aq Reseıdegi Bashqortastan men Tatarstannyń bilikti mýltıplıkatorlary qatysady.
Baıqaýǵa anımasıa salasynda belgili mamandardan qurylǵan halyqaralyq qazylar alqasy tórelik etedi. Jeńimpazdar birneshe nomınasıa boıynsha marapattalady.
Budan bólek, festıvál aıasynda sheteldik ozyq mýltıplıkatorlardyń master-klastary men trenıńteri josparlanǵan. Qatysýshylar álemge tanymal 4 mamannyń dárisin tyńdap, kásibı sheberligin shyńdaýǵa múmkindik alady.
Sondaı-aq, festıvál qonaqtary Qazaqstannyń úzdik anımasıalyq kınostýdıalary kórmesin tamashalaıdy. Onda kınostýdıalar anımasıa jasaýdyń qyr-syry men erekshelikterin kórsetip, jas mamandar úshin tájirıbe almasý alańyn uıymdastyrady.
Baǵdarlama boıynsha, is-sharanyń ekinshi kúni túrki elderindegi kıno óneriniń damý baǵyttaryna, búgini men erteńine arnalǵan dóńgelek ústel ótedi. Sheteldik jáne otandyq anımasıa salasynyń mamandary ózara baılanys ornatyp qana qoımaı, ózekti taqyryptarda pikir almasyp, túrkitildes elderdiń anımasıa salasyndaǵy yntymaqtastyǵyna jańa serpin bermek.
Qazaqstan Táýelsizdiginiń 30 jyldyǵyna oraılastyrylǵan festıváldiń bıyl Túrki dúnıesiniń rýhanı astanasy – Túrkistan qalasynda ótýi de aıryqsha mánge ıe. Uıymdastyrýshylar shahar turǵyndary men qonaqtaryna mereıtoı qarsańynda aıryqsha syı jasamaq. Túrkistandyqtar eki kún qatarynan qaladaǵy eń úzdik kınozaldardan elimizdiń jáne túrki elderiniń eń úzdik anımasıalyq fılmderin tegin tamashalaıdy.
Dástúrli festıváldi OzgeEpic zamanaýı óner keńistigi men Qazaqstan anımasıalyq kınostýdıalar qaýymdastyǵy Aqparat jáne qoǵamdyq damý mınıstrliginiń qoldaýymen uıymdastyrady.