Bul suraqqa kóp oılanýdyń qajeti joq. Ol buǵan deıin talaı aıtylyp kele jatqan qant pen fastfýd. Bul ekeýi - saý teriniń basty jaýlary.
Andrán esimdi dáriger-dermatolog, kosmetologtyń aıtýynsha, fastfýd pen qant – ádemi ári saý teriniń basty jaýlary. Maman bul ekeýinen basqa da teriniń erte qartaıýyna ákeletin ónimderdi atady.
Andrán kóp jaǵdaıda teriniń densaýlyǵy men sulýlyǵy tamaqtanýǵa baılanysty ekenin túsindirdi.
«Teriniń basty jaýy - qant. Ol glıkasıany týdyrady — ıaǵnı, ol qanttyń aqýyzdarmen birigýi jáne kollagenniń odan ári tyǵyzdalýy. Bul prosestiń áserinen ájimderdiń paıda bolýy jyldamdaıdy», - dep eskertti ol.
Alaıda, dárigerdiń aıtýynsha, qanttan tolyǵymen bas tartýdyń qajeti joq, tek tamaqtaný rasıonynda onyń mólsherin azaıtý kerek. Sol sebepti ol kúndelikti mázirde jyldam kómirsýlardyń mólsherin azaıtýdy usyndy.
Teri densaýlyǵyna fastfýd ta, snekter men alkogól de teris áser etedi, dep jalǵastyrdy Andrán. Alkogól, dermatologtyń aıtýynsha, deneniń sýsyzdanyp , qurǵaýyn týdyrady, sonyń saldarynan bette tamyrly tor paıda bolady, usaq ájimder kórine bastaıdy.
Sondaı-aq, isinýge beıim adamdarǵa 19:00-den keıin jemis jemeýge tyrysý kerek. Sebebi, olardyń quramynda frýktoza bar, ol da deneden sý shyǵarady. Jemisterge balama retinde antıoksıdantqa baı myna jıdekterdi tutynsa bolady: tańqýraı, kókjıdek, qaraqat, múkjıdek.
Teriniń densaýlyǵyn saqtaý úshin Andrán talshyqtar men aqýyzdardy jetkilikti mólsherde tutynýǵa keńes berdi. Sonymen qatar, ol atap ótkendeı, ósimdik aqýyzdary janýarlar aqýyzyn almastyra almaıdy.
«Teriniń saýlyǵy úshin durys tamaqtaný ǵana emes, jalpy salaýatty ómir saltyn ustaný da mańyzdy. Ol úshin qanyq uıqy, kúızelistermen kúresip, únemi jattyǵýlar jasaý kerek», — dep qorytyndylady dáriger.