Kadrlardyń áleýetin damytý İİM júıesindegi sapaly ózgeristerge áser etedi.
Mınıstr İİM Almaty akademıasynyń №1 fakúltetiniń tuńǵysh bitirýshilerine sertıfıkattar tapsyrdy, – dep habarlaıdy Almaty-akshamy.kz Polisia.kz saıtyna silteme jasap.
İshki ister mınıstrliginiń Almaty akademıasynda basshylyq quramdy daıarlaý fakúltetin aıaqtaǵan tyńdaýshylardyń oqý nátıjeleri shyǵaryldy.
Oqýdy jemisti aıaqtaǵan qyzmetkerlerge sertıfıkattar tapsyrý saltanatyna polısıa vedomstvosynyń basshysy qatysty.
«Memleket Basshysy Qasym-Jomart Toqaevtyń tapsyrmasy aıasynda İshki ister mınıstrliginiń aldynda polısıany reformalaýdyń mańyzdy mindetteri tur. Bizdiń maqsatymyz – menedjmentti, aqparattyq tehnologıany, qoǵammen baılanysty jáne túrli salalyq bilimdi meńgergen jańa formattaǵy polısıa kadrlaryn daıyndaý», – dep atap ótti ishki ister mınıstri Erlan Turǵymbaev.
Úsh aı boıy polısıa departamenteriniń basshylary, qylmystyq atqarý júıesi komıtetiniń jáne basqa da bólimderden kelgen tyńdaýshylar basqarý salasynyń qyr-syrlaryn, ákimshilik- sharýashylyq qyzmetin, qarjy jáne quqyqtyq saýatty, jobalaý, daǵdarystan shyǵarý jáne HR-menedjment, sheshendik óner sheberligi, BAQ-tarmen qarym-qatynas sekildi baǵyttarda tereń bilim aldy.
Olarǵa akademıanyń oqytýshylarynan bólek arnaıy shaqyrylǵan ǵalymdar, qoǵam ókilderi, depýtattar jáne ardagerler sabaq berdi. Qazirgi zaman talabyna saı basshylyq quramdy daıarlaýdyń mańyzdylyǵyn marapattaý rásiminde oqý prosesine ózi de qatysqan Qazaqstan Prezıdenti janyndaǵy Ulttyq keńestiń múshesi Rahym Oshaqbaev atap ótti.
«Kadrlardyń áleýetin damytý İİM júıesindegi sapaly ózgeristerge áser etedi. Osynda alǵan bilim azamattardyń qaýipsizdigin qamtamasyz etý deńgeıin arttyryp, quqyq qorǵaý organdaryna degen senimdi kúsheıtedi», – dedi Erlan Turǵymbaev óz sózinde.