Tanymal qazaqstandyq kıno rejıseri, ánshi, kompozıtor, aqyn jáne ónertanýshy Erlan Tóleýtaı Bishkekte ótken kınofestıvaldiń nátıjesi boıynsha úzdik akter atandy, dep habarlaıdy aqshamnews.kz
Bishkekte bes kúnge sozylǵan kıno, dıalog jáne shyǵarmashylyq jańalyqtarǵa toly kınofestıval ótti. Kınofestıval aıasynda Ortalyq Azıa baıqaýynyń jeńimpazdary anyqtaldy. Ortalyq Azıa baıqaýynyń jalpy júlde qory — 1 500 000 qyrǵyz somy.
“Úzdik akter” nomınasıasyn Erlan Tóleýtaı “Ábil” fılmindegi róli úshin jeńip aldy. Júlde: 300 000 som nemese shamamen 1,7 mıllıon teńge.
“Ábil” fılmi - Keńes Odaǵy ydyraǵannan keıingi kezeńdegi aýyl tirshiligin beıneleıtin áleýmettik drama. Kartınada kolhoz ben sovhozdardyń taraýy, jappaı jekeshelendirý úrdisi kezinde ádiletsizdikke tap bolǵan qarapaıym halyqtyń taǵdyry men qaraýsyz qalǵan aýyldaǵy beıbereket tirshilik kórinis tabady.
Týyndy táýelsizdiktiń alǵashqy jyldaryndaǵy qazaq qoǵamynyń rýhanı kúızelisi men psıhologıalyq ahýalyna tereń úńiledi. Sonymen qatar keńestik júıedegi adam ómiriniń qunsyzdanýy, turmys erekshelikteri, óz elinde ógeıdiń kúıin keshken qazaqtyń kúıi, sosıalızmnen kapıtalızmge ótpeli kezeńdegi ishki qaıshylyqtar men jańadan tamyr jaıǵan jemqorlyq máselesi de ótkir qozǵalady.
Dástúrli ánshi, ónertanýshy, pýblısıs Erlan Tóleýtaı fılmde basty róldi somdaǵan. M.Áýezov teatrynyń belgili akterleri Nurjan Beksultanova, Álıhan Lepesbaı, Ǵ.Músirepov teatrynyń akteri Ulan Núsipáliler de fılmde oınaıdy.