Prezıdenttik saılaý azamattardyń nyǵaıýyna sapaly, tyń mazmundy sıpat berdi.
Saılaý qoǵam men bılikte el damýynyń keleshegine biryńǵaı túsinik bar ekendigin qýattady. Mundaı pikirdi QR Memlekettik hatshysy Erlan Qarın bildirdi, dep habarlaıdy Almaty-akshamy.kz QazAqparatqa silteme jasap.
«Ótken prezıdent saılaýy osy jyl boıy nyǵaıa túsken qoǵamdyq shoǵyrlaný turǵysynda eldiń damýy úshin zor mańyzǵa ıe. Maýsymda ótken referendýmda qazaqstandyqtardyń 77 paıyzdan astamynyń konstıtýsıalyq reformany maquldaýy is basyndaǵy bılikti azamattardyń qoldaýyn kórsetti. Daýys berý qorytyndysynda 80 paıyzdan astam daýys jınaǵan Qasym-Jomart Toqaevtyń senimdi jeńisi bıliktiń júzege asyryp jatqan, sonymen qatar bolashaqqa josparlap otyrǵan is-áreketin azamattardyń qoldaıtynynyń jarqyn kórinisi», - dep jazdy Memlekettik keńesshi Telegram-da.
Onyń atap ótýinshe, eger referendým qoǵamnyń shoǵyrlanýynyń jańa deńgeıge kóterilýin kórsetse, prezıdenttik saılaý azamattardyń nyǵaıýyna sapaly, tyń mazmundy sıpat berdi.
«Saılaý búginde qoǵam men bılikte el damýynyń keleshegine biryńǵaı túsinik bar ekendigin qýattady. Jalpy, úlken elektoraldy sıkldiń birinshi kezeńi sátti aıaqtaldy deýge bolady. Kelesi kezek – parlamenttik jáne máslıhattar saılaýy. Qorytyndysynda, qoǵam bıliktiń shoǵyrlaýyn nyǵaıtyp, memlekettik ınstıtýttardyń turaqty júıesin qalyptastyryp, elimiz álemdik qubylmalyqtyń kúrdeli jaǵdaıynda qajetti nyq ári turaqty qor jınaqtaıdy», - dedi Erlan Qarın.