Halyqaralyq sybaılas jemqorlyqqa qarsy kúres kúni
Halyqaralyq sybaılas jemqorlyqqa qarsy kúres kúni qarsańynda Almatyda «Táýelsizdiktiń 30 jyldyǵy: sybaılas jemqorlyqqa qarsy saıasattyń qalyptasýy» atty konferensıa ótti, dep habarlaıdy Almaty-akshamy.kz.
İs-shara qalanyń Sybaılas jemqorlyqqa qarsy qyzmeti, Almaty ákimdigi, «Nur Otan» partıasy, «Atameken» UKP ókilderiniń, sondaı-aq úkimettik emes uıymdar men qoǵam qaıratkerleriniń qatysýymen ótti.
Almaty ákiminiń orynbasary Erjan Babaqumarov konferensıaǵa qatysýshylarǵa arnaǵan sózinde belsendi azamattyq qoǵamdastyqsyz sybaılas jemqorlyqty barynsha azaıtý, joıý týraly aıtýdyń maǵynasy joq ekenin atap ótti.
«Sybaılas jemqorlyqqa qarsy tabysty is-qımyl memlekettik organdar men qoǵamnyń birlesken kúsh-jigeriniń arqasynda ǵana múmkin bolady», - dedi E. Babaqumarov.
Konferensıa barysynda Almatyda 2021 jylǵy Sybaılas jemqorlyqqa qarsy is-qımyl boıynsha jumys talqylandy jáne qorytyndylandy.
Almaty qalasy boıynsha Sybaılas jemqorlyqqa qarsy qyzmettiń basshysy Murat Ahmetov sybaılas jemqorlyqqa múldem tózbeýshilikti qalyptastyrý jáne qoǵam arasynda parasattylyq, adaldyq jáne ádildik mádenıetin ilgeriletý – búginde eń mańyzdy mindetterdiń biri ekenin atap ótti.
«Sondaı-aq, osy maqsatqa jetý úshin azamattyq qoǵamnyń qatysýy qajet ekenin túsiný óte mańyzdy», - dedi M. Ahmetov.
Konferensıa aıasynda sybaılas jemqorlyqqa qarsy mádenıetti qalyptastyrýǵa úles qosqan qalanyń qoǵam qaıratkerlerin marapattaý rásimi ótti.
Almaty ákiminiń atynan gramotalardy qala ákiminiń orynbasary Erjan Babaqumarov tapsyrdy. Sybaılas jemqorlyqqa qarsy is-qımyl agenttiginiń tóraǵasynyń atynan – Almaty qalasynyń Sybaılas jemqorlyqqa qarsy qyzmetiniń basshysy M. Ahmetov tapsyrdy.
E. Babaqumarov sybaılas jemqorlyqqa qarsy is-qımyl jumysynda azamattyq qoǵam men memlekettik organdardyń kúsh-jigerin biriktirý qajettigin atap ótti.
«Qoǵam qaıratkerleriniń róli óte mańyzdy, óıtkeni olar qoǵamda sybaılas jemqorlyqqa tózbeýshilik, parasattylyq, adaldyq jáne ádildik mádenıetin taratýǵa jáne qalyptastyrýǵa óz úlesterin qosýda», - dep atap ótti E. Babaqumarov.
Óz kezeginde, M. Ahmetov sybaılas jemqorlyq kúrdeli áleýmettik, saıası jáne ekonomıkalyq qubylys ekenin, ol qandaı da bir dárejede barlyǵyna áser etetinin aıtty. Osyǵan baılanysty, qoǵamshyldardyń kómegi baǵa jetpes.
Almaty TV telearnasynyń bas dırektory N. Muhamedjanova, «Qazaqfılm» AQ prezıdenti A. Sataev, «Almaty - Adaldyq Alańy» jobalyq keńsesiniń basshysy A. Sábıtova, «Sanaly Urpaq» respýblıkalyq jobalyq keńsesiniń basshysy Q. Tokýshev jáne basqa da jurtshylyq ókilderi erekshe úlesi men belsendi qyzmeti úshin marapattaldy.