Qala kúnin merekeleý onlaın formatta ári sanıtarlyq normalardy saqtaı otyryp ótedi: qala turǵyndaryn qaýipsizdik talaptaryn oryndaýǵa shaqyrady.
Almaty qalasy ákiminiń orynbasary Erjan Babaqumarov jyl saıyn qyrkúıek aıynyń úshinshi jeksenbisinde almatylyqtar atap ótetin Qala kúnin merekeleýdi uıymdastyrý boıynsha onlaın formatta jumys keńesin ótkizdi, dep habarlaıdy almaty-akshamy.kz
Bıyl Qala kúnine oraı is-sharalardy ótkizýdiń eki nusqasy ázirlendi, atap aıtqanda, sanıtarlyq-epıdemıologıalyq ahýaldyń damýyna baılanysty oflaın jáne onlaın-sharalar qarastyrylǵan.
Qalalyq sanıtarlyq-epıdemıologıalyq baqylaý departamentiniń basshysy, megapolıstiń bas memlekettik sanıtarlyq dárigeri J. Bekshın Almatyda sońǵy táýlikterde koronavırýs ınfeksıasyna qatysty oń PTR saraptamasy bar 704 naýqastyń anyqtalǵanyn, bul juqtyrýdyń 0,49%-ǵa óskenin kórsetetinin aıtty. «Sımptomdy» naýqastardyń úlesi artýda, 9 qyrkúıekte 96%-ǵa jetti. Demek, pandemıa dınamıkasy turaqsyz. Sondyqtan koronavırýs ınfeksıasynyń taralýynyń aldyn alý ári Qala kúnin eskere otyryp, sanıtarlyq-epıdemıologıalyq sharalardy kúsheıtý qajet.
Sonymen qatar, kásipkerlik sýbektileri arasynda epıdemıologıalyq qaýipsizdiktiń belgilengen talaptaryn buzý jaǵdaılaryn tirkeý jalǵasýda. Tek aǵymdaǵy jyldyń 9-12 qyrkúıegi aralyǵynda zańdy tulǵalardyń karantındik sharalardy buzǵany jóninde 34 fakti anyqtaldy, sonyń ishinde maska rejımin saqtamaý boıynsha. Buqaralyq sharalar ótetin bolsa,onda juqtyrý qaýpiniń arta túsetini anyq.
Keńesti qorytyndylaǵan Almaty qalasy ákiminiń orynbasary Erjan Babaqumarov epıdemıologıalyq ahýaldyń turaqsyz ári Almaty qalasynyń áli de «qyzyl» aımaqta ekenin eskere otyryp, barlyq mádenı is-sharalardy onlaın rejımde ótkizýge sheshim qabyldanǵanyn aıtty. Oflaın formatta ótetin barlyq mádenı, oıyn-saýyq jáne buqaralyq kóńil kóteretin is-sharalar toqtatyldy.
Almatyda Qala kúnin merekeleý aıasynda birqatar nysandar ashyq bolady, ıaǵnı skverler men saıabaqtar, balabaqshalar, mektepter janyndaǵy jańa korpýstar jumys jasaıdy, az qamtylǵan jáne kópbalaly otbasylarǵa páter kiltteri tapsyrylady jáne jáne t.b. Vaksınalanǵan qalalyqtar karantındik shekteýlerdi qatań saqtaı otyryp, áleýmettik jáne qaıyrymdylyq sharalaryna qatysa alady.
Qala kúnin merekeleý kezinde megapolıs turǵyndary men qonaqtary dertti juqtyrmaýy tıis. Sondyqtan, monıtorıńtik toptar Polısıa departamentimen birge aǵymdaǵy jyldyń 19 qyrkúıeginen bastap aldaǵy aptalarda belgilengen shekteýlerdi baqylaý sharalaryn kúsheıtetin bolady. Sonymen qatar, aýdandar ákimdikteri eriktiler uıymdaryn tarta otyryp, adamdar kóp jınalatyn jerlerde sanıtarlyq posttar men patrúlderdiń jumystaryn jandandyrady. Qalalyq qoǵamdyq densaýlyq basqarmasy vaksınalanýdy keńeıtý boıynsha jumysty jalǵastyrady, qalalyqtarǵa yńǵaıly bolý úshin jyljymaly egý pýnktteri jumys isteıtin bolady.
Almaty qalasynyń ákimdigi COVID-19-ǵa qarsy vaksınalanýǵa jáne profılaktıkalyq sharalardy saqtaýǵa shaqyrady. Betperde taǵýdy, áleýmettik qashyqtyqty saqtaýdy este ustaǵan jón. Ótken táýlikte birinshi komponentpen 3 033 adam, ekinshi komponentpen 3 448 adam egildi. Barlyq kezeń ishinde 919 907 adamǵa I komponent, 807 786 adamǵa II komponent salyndy. Alaıda vaksına alǵandar sany eki mıllıondyq megapolıste ujymdyq ımýnıtetti qalyptastyrý úshin jetkiliksiz. Aǵymdaǵy jyldyń 16 qyrkúıegindegi halyqtyń ımýndyq qabaty halyqtyń resmı sanynyń 48%-yn qurady. Almatylyqtardy vaksınalanýǵa shaqyrady, ol úshin medısınalyq uıymdarda, mektepterde, mádenıet jáne sport nysandarynda, bazarlarda jáne qalanyń SOSO 160 egý pýnkti jumys isteıdi.