Almaty qalasy Máslıhatynyń sheshimderi ózgeristerge sáıkes jańartylyp jatyr. Almaty qalasy Ekologıa jáne qorshaǵan orta basqarmasynyń basshysy mindetin ýaqytsha atqarýshy M. M. Gaısın máslıhat sesıasynda erekshe qorǵalatyn tabıǵı aýmaqtardy paıdalanǵany úshin tólemaqy mólsherlemeleriniń kúshin joıý qajettigin túsindirdi.
Buǵan deıin, 2012 jyly Qazaqstan Respýblıkasynyń Salyq kodeksiniń 591-babyna jáne «Erekshe qorǵalatyn tabıǵı aýmaqtar týraly» zańnyń 10-babyna sáıkes, Almaty qalasy Máslıhatynyń sheshimimen "Medeý" memlekettik óńirlik tabıǵı parki úshin tólemaqy mólsherlemeleri bekitilgen bolatyn. Bul sheshimge 2014 jáne 2018 jyldary redaksıalyq ózgerister engizilgen.
Alaıda, 2024 jylǵy 9 qyrkúıekte Salyq kodeksine engizilgen ózgeristerge baılanysty, erekshe qorǵalatyn tabıǵı aýmaqtardy paıdalanǵany úshin tólemaqyny retteıtin baptar alynyp tastaldy. Zańǵa engizilgen tıisti túzetýler nátıjesinde, endi Almaty qalasy ákimdigi men máslıhatynyń tólemaqy mólsherlemelerin belgileýge quzyreti joq.
M. M. Gaısınniń aıtýynsha, bul ózgerister Almaty qalasynyń quqyqtyq qujattaryn QR qoldanystaǵy zańnamasyna sáıkestendirýdi talap etedi. Osyǵan oraı, "Medeý" memlekettik óńirlik tabıǵı parkine qatysty tólemaqy mólsherlemelerin bekitken Máslıhat sheshimderiniń kúshi joıyldy dep taný qajettigi týyndap otyr.
"Qurmetti depýtattar, bul ózgeris quqyqtyq retteýdiń qazirgi talaptaryna tolyq sáıkes keledi jáne zańnamalyq normalardy saqtaý maqsatynda jasalýda. Qoldaýlaryńyzdy suraımyn", – dep qorytyndylady M. M. Gaısın.