Almaty qalalyq Psıhıkalyq ortalyǵy «SenQ» brendiniń jetekshisi Jámıla Seıitjanmen jáne sýretshi Darıa Qasymovamen birlesip, «Meniń avtorlyq oramalym» atty erekshe sheberlik dárisin uıymdastyrǵan bolatyn.
Oǵan erekshe balalar tárbıelep otyrǵan 15 almatylyq áıel-ana qatysty, dep habarlaıdy Almaty-akshamy.kz
Bul jobanyń maqsaty – erekshe balalardy baǵyp-qaǵyp, perzentine ǵumyryn arnap júrgen analarǵa qýanysh, jaqsy kún syılaý jáne psıhıkalyq aýrýlarǵa shaldyqqan jandardyń ózekti máselesine qoǵam nazaryn aýdarý.
Jobaǵa qatysqan áıelderge art-terapıalyq sheberlik dárisinde qıalynda, túısiginde ne tur, sony aq qaǵaz betine túrli boıaýmen beıneleýge múmkindik usynyldy. Olar aldymen art-terapıanyń ádis-tásilderimen tanysty. Boı, oı sergitetin jattyǵýlar jasaǵannan keıin, qylqalamdy qolǵa alyp, túrli taqyrypta sýretter sala bastady.
– Art-terapıada qatyp qalǵan ereje joq, adam neni beınelegisi kelse, sony qaǵazǵa túsire beredi. Jobaǵa qatysqan analar kók aspandy, onda qalyqtaǵan qustardy, jarqyrǵan kúndi, ashyq tústi gúlderdi, ana men balany, bıik-bıik taýlardy beıneledi. Osylaısha erekshe bala ósirip otyrǵan analar bir sátke bolsa da tirshilik taýqymetin umytyp, qıalyna, shabytyna erik berip, shyǵarmashylyq álemge saıahattady. Mundaı art-terapıa ana men balany odan ári jaqyndastyra túsedi, olar sýret salý arqyly birin-biri jaqsy túsinetin bolady, – deıdi sýretshi Darıa Qasymova.
Búginde elimizde ınklúzıvti ortany damytý máselesiniń jan-jaqty qolǵa alynyp jatqany qýantady. Al búgingi art-terapıa bizdiń megapolıste alǵash ret uıymdastyrylyp otyr.
«Meniń avtorlyq oramalym» jobasynyń eń bir áserli sáti sol, onyń demeýshisi – otandyq brend sanalatyn «SenQ» dızaınerleri analar salǵan qaǵazdaǵy sýretterdi mataǵa kóshirip basty. Sóıtip ár avtorǵa ózi salǵan sýret pen esimi jazylǵan oramal saltanatty túrde tartý etildi.
Sapar RAHMENSHEEV, Almaty qalalyq Psıhıkalyq saýyqtyrý ortalyǵynyń dırektory:
– Búginde Almaty qalasy boıynsha 2500-den astam bala dıspanserlik esepte tur. Olar aqyl-esiniń kemistigi bar, aýtızm, shızofrenıa, organıkalyq ózgerister dıagnozdary bar jetkinshekter. Ortalyqtyń basty mindeti – osy dıspanserlik baqylaýda turǵan balalardy qoǵamǵa beıimdeý. Jýyrda balalarǵa arnalǵan teatr synybyn ashý oıymyzda bar. Buǵan deıin eresekterge arnalǵan «Qysqy baq» ashqan edik. Endi arnaıy jer bólip, kishkentaı balalarǵa da arnap baq ashamyz dep otyrmyz. Balalar sol baqqa óz qolymen túrli aǵash pen gúl otyrǵyzatyn bolady. Biz olarǵa aýrý dep emes, qoǵamnyń bir múshesi dep qaraýymyz kerek. Erekshe kútimdi qajet etetin balalardy tárbıelep otyrǵan ata-analardyń da qamqorlyqtan tys qalmaǵany durys. Sol úshin de osy jobany qolǵa aldyq. Balamen júrip ózin umytyp ketetin áıel-analarǵa osylaı qoldaý kórsetýdi dástúrge aınaldyrýdy kózdep otyrmyz. Aldaǵy ýaqytta erekshe bala tárbıelep otyrǵan ákelerdi de qatystyrsaq deımiz.