Bári tegin. Qala mýzeıleri kelýshilerdi 18:00-den 00:00-ge deıin mýzeı qupıalaryn ashyp, biregeı mýzeı murasymen tanystyrady.
«Mýzeıler túni» - bul Halyqaralyq mýzeıler kúnine oraı kóptegen mádenı mekemelerdiń qatysýymen jyl saıyn dástúrli túrde uıymdastyrylatyn aksıa, dep habarlaıdy almaty-akshamy.kz.
Aksıaǵa Almaty qalasy mýzeıler birlestiginiń segiz mýzeıi qatysady: Almaty mýzeıi, Yqylas atyndaǵy halyq mýzykalyq aspaptar mýzeıi, D.A. Qonaev mýzeıi, N. Tilendıevtiń memorıaldyq mýzeıi, S. Muqanov pen Ǵ. Músirepovtyń ádebı-memorıaldyq mýzeı kesheni, Mýltımedıalyq dástúrli mýzyka ortalyǵy jáne A. Baıtursynuly mýzeı-úıi.
Aksıa aıasynda qala qonaqtary men turǵyndary mýzeı qyzmetkerleriniń ǵylymı zertteýleri barysynda qaıta ashylǵan jáne ádette kópshilik kóre almaıtyn biregeı eksponattardy kórip, kvest, vıktorınalar men konkýrstarǵa, tarıh jáne mádenıetke qatysty tanymdyq oıyndar oınap, sheberlik saǵattarǵa qatysa alady.
Almaty mýzeıine kelýshiler memleket jáne qoǵam qaıratkeri Ózbekáli Jánibekovtiń ómiri men qyzmetine arnalǵan kórmeni tamashalaı alady. Sonymen birge, «Show Today» komandasy kelýshilerge mýzeıge baılanysty tapsyrmalar arqyly, mýzykalyq bilimin, bı men jyldamdyǵyn synaı alatyn, toptyq, ınteraktıvtik, ıntellektýaldyq saıysyn usynady. Bul oıyndar Yqylas atyndaǵy halyq mýzykalyq aspaptar mýzeıindede ótedi.
Birlestik mýzeıleri kelýshilerge ekskýrsovod-gıdterdiń, kórnekti tulǵalardyń urpaqtarymen, mádenıet qaıratkerleriniń, tanymal ártister men blogerlardyń qatysýymen ótetin mádenı-tanymdyq baǵdarlama usynady.
Sonymen qatar, aksıa aıasynda jeti mýzeıdi qamtıtyn qyzyqty kvest-oıyny ótedi. Qatysýshylar ár mýzeı tarıhyn bilýden saıysqa túsedi. Komandalar maqsaty – pano qurastyrý úshin mýzeı qyzmetkerleri daıyndaǵan suraqtarǵa jaýap berip, barlyq pazldardy jınaý. Komandarlardy medıa tulǵa kapıtandar Kırıll Meıster, Áıgerim Územbaeva jáne Tahır Sultan bastaıdy.
Aksıa Eýropa keńesi men Halyqaralyq mýzeıler keńesiniń (ICOM) qamqorlyǵymen ótkizilýde. Alǵashqy ret «Mýzeıler túni» 1997 jyly Berlınde ótti. 1999 jyly Fransıanyń Mádenıet jáne komýnıkasıalar mınıstrliginiń bastamasymen bul shara keńeıtildi: barlyq fransýz mýzeılerinde kóktemniń bir jeksenbisinde kelýshilerge tegin kirý múmkindigin ashý usynyldy. Aksıa «Mýzeıler kóktemi» dep ataldy. 2001 jyldan beri Eýropa Keńesiniń Mádenıet jónindegi konvensıasyna qol qoıǵan 39 eldiń barlyq mýzeıleri bul aksıaǵa qatysyp úlgerip, bul mádenı sharany basqarý osy elderdiń mádenıet mınıstrlikterine júktelgen. 2005 jyly «Mýzeıler kóktemi» «Mýzeıler túnine» aınaldy. 2005 jyly aksıaǵa Fransıanyń 750 mýzeıi jáne Eýropanyń 500 mýzeıi qatysty.
«Mýzeıler túni» aksıasy Qazaqstanda alǵash ret 2006 jyly ótkizildi.
- Almaty mýzeıi – Qabanbaı batyr kóshesi, 132
- Yqylas atyndaǵy halyq mýzykalyq aspaptar mýzeıi – Zenkov kóshesi, 24a
- D. A. Qonaev mýzeıi – Tólebaev kóshesi, 117
- N. Tilendıev memorıaldyq mýzeıi – Qonaev kóshesi, 96
- S. Muqanov jáne Ǵ. Músirepov atyndaǵy ádebı-memorıaldyq mýzeı kesheni – Tólebaev kóshesi, 125
- Mýltımedıalyq dástúrli mýzyka ortalyǵy – Nurkent yqsham aýdany 5/11
- A. Baıtursynuly mýzeı-úıi – Baıtursynuly, 60