Almatylyq erekshe týǵan jetkinshekter qala turǵyndary men meımandaryn ózderiniń qoıylymyna shaqyrady.
Psıhıkalyq syrqattyń saldarynan qoǵamnan oqshaýlanyp, dertimen alysqan kishkentaı naýqastar tuńǵysh márte el aldynda ónerin, akterlik sheberligin kórsetedi.
Ónerpazdar «Pil men tyshqannyń dostyǵy» qoıylymyna uzaq daıyndaldy. Bul qoıylym arqyly balalar otbasyndaǵy qamqorlyq, psıholog, psıhıatrlardyń úzdiksiz medısınalyq kómegimen keseldiń qursaýynan qutylýǵa umtylysy men «qoǵamnyń bir kirpishi bolyp qalanýǵa» degen talpynysyn pash etpekshi.
“Teatr synyby - balalardy qoǵamǵa beıimdeýdiń bir túri. Birinshiden, olar taqpaq jattaıdy. Ekinshiden, kópshiliktiń aldynda sóz saptaý, ózin-ózi ustaýdy úırenedi. Sonymen birge balanyń boıynda ónerge degen qyzyǵýshylyǵyn oıatýǵa septigin tıgizedi degen maqsatpen osy synypty ashyp otyrmyz. 1 maýsym - Halyqaralyq balalar kúnine oraı kishkentaı emdelýshiler qoıylym qoıyp, asfáltqa sýret salady. Olar qorshaǵan ortaǵa , qoǵamǵa óziniń kózqarasyn bildiredi”, - deıdi ortalyq dırektory Sapar Rahmensheev.
Aldymyzdaǵy jumada, ıaǵnı 31 mamyrda elimizdegi psıhıkalyq saýyqtyrý ortalyǵynda ashylǵan tuńǵysh teatr synyby ónerpazdary sizderdi qoıylymǵa shaqyrady.