Túrksib aýdany turǵynynyń suraǵy: Men balalarǵa ınklúzıvti bilim beretin ári kúnine 25-30 adam keletin mektepke kómek kórsetýdi ótinemin. Bul - kúndizgi ortalyq. Ortalyqty jabdyqtaýǵa bizde 40 mln teńge kóleminde qarajat bar, biraq úı-jaı joq. Qazirgi ýaqytta "Baqytty otbasy" keńsesi ornalasqan Zenkov, 15 ortalyǵy berilse nemese Saýranbaevtaǵy nysandardyń birinshi qabattarynan da bolýy múmkin.
Almaty qalasynyń ákimi Erbolat Dosaev: "Sizge kezdesýler saıyn qalada ınklúzıany arttyrý máselelerin júıeli túrde kóterip otyrǵanyńyz úshin alǵys aıtamyz. Men úshin olar árqashan basymdyqqa ıe. Aýdan ákimine tapsyrma beremin. Ortalyqty qurýǵa qarajatyńyz bar-joǵyn eskere otyryp, ne isteýge bolatynyn qarastyramyz. Aýdan ákimdigi máseleni eki apta boıy qaraıdy, sodan keıin maǵan baıandaıdy".
Eske salsaq, Almaty ákimi Erbolat Dosaevtyń aýdan turǵyndarymen kezdesýi "Almaty" telearnasynyń efırinde sýrdo súıemeldeýimen ótýde. Bul qala basshysynyń múmkindigi shekteýli azamattar men erekshe qajettilikteri bar adamdar úshin Almaty qalasyn beıimdeý jónindegi bastamasynyń bir bóligi.
Almaty ákimdigi qalada barlyq qajetti jaılylyqtarmen ınklúzıvti orta qurýǵa, onyń ishinde múgedektigi bar adamdardy áleýmettendirýge jáne beıimdeýge baǵyt alǵan edi. Ár aýdanda múmkindigi shekteýli azamattarǵa arnalǵan áleýmettik qoldaý ortalyqtary, oqý jáne bilim berý mekemeleri belsendi jumys isteıdi, sondaı-aq áleýmettik baǵyttaǵy obektiler múgedektigi bar adamdardyń qajettilikterin eskere otyryp jaılastyrylady.
Budan basqa, Erbolat Dosaevtyń bastamasymen Almatyda múmkindigi shekteýli azamattar men múgedek adamdarǵa arnalǵan nysandardy beıimdeý jobasy júzege asyrylýda. Ol úshin megapolıste 2023 jyldan bastap alǵash ret áleýmettik nysandardy pasporttaý boıynsha aýqymdy jumystar júrgizilýde.