Memleket basshysynyń Almatyny «baq qala» retinde qaıta jańǵyrtý jónindegi tapsyrmasyn oryndaý aıasynda megapolısti aýqymdy kógaldandyrý baǵdarlamasy qarqyndy júzege asyrylyp jatyr. Bul týraly Almaty ákimi Erbolat Dosaev 2025–2027 jyldarǵa arnalǵan qala búdjetiniń jobasy talqylanyp jatqan máslıhat sesıasynda málimdedi, dep habarlaıdy aqshamnews.kz
Negizgi bastamalardyń biri 2022 jyly bekitilgen «Jasyl Almaty» jol kartasy. Baǵdarlamanyń basty maqsaty 2030 jylǵa deıin 2,5 mln jasyl jelek otyrǵyzý. Jyl saıyn 320 myń aǵash pen buta otyrǵyzý kózdelgen. 2025 jylǵa deıin 1,2 mln, al 2030 jylǵa deıin shamamen 1,3 mln aǵash otyrǵyzylady.
2024 jyly 320 myń jasyl jelektiń 224 myń kósheti otyrǵyzyldy, onyń ishinde 150 myńnan astamy aǵash, al 74 myńy buta. Aǵash otyrǵyzý jumystary jalǵasýda, jyl sońyna deıin taǵy 96 myń kóshet otyrǵyzý josparlanǵan.
«Memleket basshysynyń «Almaty – baq qala» mártebesin qaıta jańǵyrtý tapsyrmasyn sapaly júzege asyrý maqsatynda 2023-2024 jyldary 500 km avtosýarý jáne tamshylatyp sýarý jelileri ornatyldy. 2025 jyly taǵy 290 km jeli tartý úshin 4,1 mlrd teńge bólinedi. Bul júıe 1 mln-nan astam aǵashty avtomatty sýarý júıesimen qamtýǵa múmkindik beredi», – dedi Erbolat Dosaev.
Esterińizge sala keteıik, 2024 jyldyń sáýir aıynda «Almaty – bizdiń ortaq úıimiz» naýqany aıasynda «Almaty – baq qala» aksıasy ótkizildi. İs-shara barysynda 7 myńnan astam jasyl jelek, onyń ishinde 4 015 jemis aǵashy (onyń 3 855-i alma aǵashy), 1 090 japyraqty aǵash jáne 2 600 buta otyrǵyzyldy.
Negizgi kógaldandyrý jumystary qalanyń mańyzdy aımaqtarynda júrgizildi: «ALA» saıabaǵynda 2 270 alma aǵashy, ÚAK kóshesiniń soltústigindegi saıabaqta 500 jemis aǵashy (250 alma aǵashy jáne 250 órik aǵashy), Boraldaı ózeni boıyndaǵy baqylaý alańynda 1 000 japyraqty aǵash otyrǵyzyldy.
Aýdandyq ákimdikter de alma aǵashtary aleıalaryn jáne butalardy otyrǵyzýǵa belsendi atsalysty. Alataý aýdanynda 70 alma aǵashy jáne 250 buta, Medeý aýdanynda 220 alma aǵashy, onyń ishinde 150-i Almaty haıýanattar baǵy aýmaǵynda, Bostandyq aýdanynda 230 alma aǵashy, onyń ishinde 150-i Tuńǵysh Prezıdent saıabaǵynda otyrǵyzyldy.
«Jasyl Almaty» jol kartasy – tek ekologıalyq jaǵdaıdy jaqsartýǵa ǵana emes, sonymen qatar qala turǵyndarynyń ómir sapasyn arttyrýǵa baǵyttalǵan bastama. Jasyl jelekter mıkroklımatty jaqsartýǵa, aýa lastaný deńgeıin tómendetýge jáne jaıly qalalyq orta qurýǵa yqpal etedi.