Qala basshysy Almaty áýejaıynda qyzmet kórsetý sapasyna qatysty birqatar máseleni ınvestorǵa aıtty
Almaty ákimi Erbolat Dosaev pen TAV Airports Holding kompanıasynyń prezıdenti Serkan Kaptan Almaty halyqaralyq áýejaıynyń jańa jolaýshylar termınalynyń qurylys barysyn talqylady, dep habarlaıdy Almaty-akshamy.kz Almaty.tv. -ke silteme jasap.
S. Kaptan atap ótkendeı, qazir negizgi qurylys-montaj jumystary 65%-ǵa bitti. Qurylys qarqyny jedeldep otyr. Qoldanystaǵy termınaldyń estakadasy bıyl 1 qyrkúıekke deıin ashylady. Nysandy paıdalanýǵa berý belgilengen merzimnen buryn – 2024 jyly jaz aıynyń basyna josparlanyp otyr.
Qala basshysy Almaty áýejaıynda qyzmet kórsetý sapasyna qatysty birqatar máseleni ınvestorǵa aıtty. Almatylyqtar men qala qonaqtary birneshe saǵattyq kezekti, júkti uzaq kútýdi, kólik turaǵynyń jetispeýshiligin jáne tıisti shara qabyldaýdy talap etetin ózge de yńǵaısyz jaǵdaıǵa tap bolyp otyr.
S. Kaptannyń aıtýynsha, jazǵy kanıkýl men demalys kezinde reısterdiń kóbeıýine baılanysty qosymsha kezek pen keptelis baıqalýy múmkin. Áýejaı ákimshiligi qyzmet kórsetý sapasyn jaqsartý boıynsha sharalar qabyldap otyr – júk jelileri jańartyldy, jańa kondısıa júıeleri ornatyldy, jaıly avtobýstar satyp alyndy. Jańa halyqaralyq jolaýshylar termınalynyń aýdany 53,500 m2. Ol paıdalanýǵa berilgen soń Almaty áýejaıynyń ótkizý qabileti jylyna 14 mln adamǵa deıin artady, bul áýe aılaǵynyń jumysyn retke keltirýge múmkindik beredi. Aıta keteıik, byltyr Almaty halyqaralyq áýejaıy jylyna 2,7 mln adamǵa eseptelgen ótkizý qabileti kezinde 7,2 mln jolaýshyny qabyldady. Bıyl jolaýshylar sany 9 mln adamǵa deıin ósedi dep boljanýda.
Jańa jolaýshylar termınaly ashylǵan kezde áýejaı ákimshiligi eskisin jańartýdy kózdep otyr. Osylaısha, jańa jolaýshylar termınaly tek halyqaralyq reısterge, al qoldanystaǵy termınal ishki reısterge qyzmet kórsetedi.
Almaty halyqaralyq áýejaıyn keńeıtý jónindegi aýqymdy joba jolaýshylar termınaly men jalpy maqsattaǵy avıasıanyń jańa ǵımarattaryn salýdy, sonymen qatar estakadany, ushý-qoný jolaǵyn jáne vokzal mańy aýmaǵyn qaıta jańartýdy qamtıdy.
Keńes qorytyndysy boıynsha taraptar kórsetiletin qyzmetterdiń sapasyn jaqsartýǵa baǵyttalǵan birlesken Jol kartasyn iske asyrý týraly ýaǵdalasty. Erbolat Dosaev qurylys jumystarynyń aıaqtalýyn jedeldetý qajettigin atap, nysannyń strategıalyq mańyzyna baılanysty Almaty ákimdigi tarapynan jan-jaqty qoldaý kórsetýge daıyn ekenin bildirdi. Aıta keteıik, buǵan deıin Almaty halyqaralyq áýejaıynyń jańa jolaýshylar termınaly ǵımaratynyń ashý 2024 jyldyń tamyzyna josparlanǵan bolatyn. Buǵan qosa, Serkan Kaptan jaqynda qurylys nysandary boıynsha baspasóz týrynyń ótetinin habarlady, kez kelgen nıet bildirýshi Almaty halyqaralyq áýejaıyn keńeıtý jáne damytý jónindegi jobanyń iske asyrylý barysymen tanysa alady.