Qazaqstan quramasynyń atynan 100-den astam sportshy qatysyp, jarys baǵdarlamasyna engen 23 sport túriniń ishinen 15-inde baq synaıdy, dep habarlaıdy aqshamnews.kz
Ashylý rásimi "Al-Djandrıa" ıpodromynda uıymdastyryldy. Munda Saýd Arabıasyna tán dástúrli naqyshtar zamanaýı jaryq shoýymen, 3D-kórinispen, drondar qoıylymymen jáne ónerpazdar men fólklorlyq toptardyń áserli ónerimen úılesim tapty.
Er-Rıadtaǵy oıyndar "One Nation" ("Bir ult") uranymen ótýde. Bul uran ıslam álemindegi elderdiń birligi men ózara túsinistigin bildiredi. Atalǵan ıdeıa ashylý rásiminiń mádenı baǵdarlamasynda da aıqyn kórinis tapty.
Saltanatty sharanyń negizgi bóligi retinde dástúrli sportshylar sherýi ótti. Onda Islamıada-2025 týrnırine qatysýshy 57 eldiń ókilderi sap túzedi. Qazaqstan quramasynyń tý ustaýshylary aýyr atlet Nurǵısa Ádiletuly men dzúdoshy Arýna Djangeldına boldy.
Er-Rıadtaǵy Islam yntymaqtastyǵy oıyndary 21 qarashaǵa deıin jalǵasady.