Aral ekologıasy muzdyqtardyń erýi men muhıt deńgeıiniń joǵarylaýy sebepteriniń birine aınalyp otyr.
Bırmıngem qalasynda (Ulybrıtanıa) Eýropadaǵy Qaýipsizdik jáne Yntymaqtastyq Uıymy Parlamenttik Assambleıasynyń jazǵy sesıasy óz jumysyn bastady. Oǵan Qazaqstan Respýblıkasy Parlamentiniń delegasıasy qatysty, dep habarlaıdy Almaty-akshamy.kz. Egemen.kz silteme jasap.
EQYU PA Turaqty komıtetiniń otyrysy barysynda Qazaqstan delegasıasyn bastaǵan Asqar Shákirov pen Ózbekstan delegasıasyn bastap kelgen Sadyq Safoev uıymdy jáne oǵan múshe memleketterdi Aral teńizin qutqarý jónindegi jobalardy iske asyrýǵa donor bolýǵa shaqyryp, eki el parlamentteriniń birlesken úndeýin jarıa etti.
Sesıaǵa qatysýshylarǵa taratylǵan qujatta sońǵy 60 jylda eń aýqymdy jabyq sý aıdynynyń buryn-sońdy bolmaǵan kólemde azaıýyna jáne sortańdanýyna nazar aýdaryldy. Shańdy daýyldar jyl saıyn 100 mıllıon tonnadan astam maıda tuzdy shańdy, ýly tuz ben qumdy myńdaǵan shaqyrymǵa áketedi, Eýropa elderine, Japon araldary men Antarktıdaǵa jetkizip, muzdyqtardyń erýi men muhıt deńgeıiniń joǵarylaýy sebepteriniń birine aınalyp otyr.
Onkologıalyq aýrýlar eń joǵary paıyzdy kórsetip otyrǵan Ortalyq Azıadaǵy Aral óńiri halqynyń densaýlyq jaǵdaıynyń kúrt nasharlaýyna turǵylyqty jerdiń ekologıalyq azyp-tozýy sebep bolǵany atap ótildi.
Ekologıalyq apattyń aýqymy Aral teńizi baseınindegi áleýmettik-ekonomıkalyq jáne ekologıalyq ahýaldy saýyqtyrý jónindegi problemalardy keshendi sheshý úshin óńirdegi elderdiń ǵana emes, búkil halyqaralyq qoǵamdastyqtyń kúsh-jigerin biriktirý talap etetini atap ótildi. Qazaqstan men Ózbekstan kóshbasshylary Qasym-Jomart Toqaev pen Shavkat Mırzıeev osyndaı ortaq pikirge shaqyrýda.