Eýroparlament, Eýrokomıssıa jáne EO memleketteriniń ókilderi úsh kúndik kelissózderden keıin jasandy ıntellekt týraly zań boıynsha saıası kelisimge qol jetkizdi. Eýropada jasandy ıntellekt týraly álemdegi alǵashqy zań qabyldanýy tıis, dep habarlaıdy almaty-akshamy.kz DW-ge silteme jasap.
Eýropalyq Odaq jasandy ıntellektini (JI) paıdalanýǵa qatysty normalardy qatańdatady.
Tıisti erejeler (Artificial Intelligence Act) týraly Brússelde 8 jeltoqsan, juma kúni keshke Eýroparlament, Eýropalyq komısıa jáne EO-ǵa múshe elderdiń ókilderi úsh kúndik kelissózderden keıin kelisti.
Eýroparlament habarlamasynda atap ótilgendeı, zań jobasynyń maqsaty «Eýropadaǵy jasandy ıntellekt qaýipsizdigin, negizgi quqyqtar men demokratıany qurmetteýdi jáne bıznestiń órkendeýi men keńeıý múmkindigin qamtamasyz etýge» baǵyttalǵan.
Eýropalyq komısıanyń 2021 jyldyń sáýirindegi usynysyna sáıkes, jasandy ıntellekt júıeleri ártúrli táýekel toptaryna bólinýi kerek. Qosymshanyń yqtımal qaýpi neǵurlym joǵary bolsa, oǵan qoıylatyn talaptar soǵurlym qatań bolýy tıis.
Jasandy ıntellekttiń úlken derektermen jumys isteýge úıretilgen óte qýatty modelderi - bazalyq modelderdi retteý máselesi boıynsha kelissózder toqtaı jazdady, dep jazady dpa agenttigi. Kóptegen basqa qosymshalarǵa negizdelýi múmkin uqsas negizgi úlgilerge, mysaly, GPT kiredi. Germanıa, Fransıa jáne Italıa retteý negizgi tehnologıanyń ózine emes, tek naqty JI qosymshalaryna qoldanylýyn jaqtady