2025 jyldyń 10 qańtarynda QR Ónerkásip jáne qurylys mınıstrliginde Dena (Deutsche Energie-Agentur) Germanıa agenttiginiń ókilderimen kezdesý ótti.
Kezdesý barysynda energetıka saıasaty, qala qurylysy jáne energıa tıimdiligi salasyndaǵy negizgi máseleler talqylandy, dep habarlaıdy aqshamnews.kz.
Kezdesý barysynda energetıka máseleleri boıynsha pikir almasý ótip, qatysýshylar osy saladaǵy perspektıvalar men ózekti máselelerdi qarastyrdy. Erekshe nazar energıa tıimdiligi salasynda josparlaý men taldaýdy jaqsartýǵa arnalǵan ınteraktıvti kartany ázirleý men engizýge aýdaryldy. Sonymen qatar, Germanıanyń zańnamalyq tájirıbesi qarastyrylyp, energıa únemdeý jáne turaqty qurylys úshin tıimdi normatıvtik aktilerdi ázirleý máselesi talqylandy. Germanıalyq sarapshylar dekarbonızasıa maqsattaryn júzege asyrý strategıasyna qatysty usynystaryn bildirip, Energetıkalyq konsepsıanyń maqsattaryna jetý úshin birneshe tásilderdiń birigýiniń mańyzdylyǵyn atap ótti. Ásirese, turaqty zańnamalyq negizderdi qurýǵa baǵyttalǵan senimdi ákimshilik normalardy ázirleýdiń qajettiligine erekshe kóńil bólindi.
Sondaı-aq, 2024 jylǵy ǵımarattardaǵy energıa tıimdiligi týraly zańǵa (GEG 2024) nazar aýdaryldy, ol jańa jáne qoldanystaǵy ǵımarattardyń energetıkalyq sapasyn, sonyń ishinde olardyń jańǵyrtylýyn retteıdi.
Budan bólek, energetıkalyq ınfraqurylymdy jaqsartýǵa baǵyttalǵan Felicity II jobasyn júzege asyrý múmkindikteri jáne jobalyq ofıs qurý máseleleri qaraldy.
Taraptar energıa tıimdiligi, turaqty qurylys jáne energetıka salasyndaǵy halyqaralyq jobalar boıynsha yntymaqtastyqty odan ári tereńdetýge qyzyǵýshylyq bildirdi.