«Energıa» úılestirý dıspecherlik ortalyǵynyń arnaıy komısıasy 2022 jylǵy 25 qańtarda bolǵan apatqa qatysty tergeý-tekserý jumystaryn aıaqtady.
KEGOC AQ habarlaýynsha, onyń quramyna Ortalyq Azıanyń, atap aıtqanda, Qazaqstan, Ózbekstan, Qyrǵyzstannyń energıa júıeleri júıelik operatorlarynyń ókilderi kirgen.
Komısıa apattyń sebebin Ózbekstannyń energıa júıesinde bolǵan ajyratylýdan týyndaǵanyn anyqtady, dep habarlaıdy Almaty-akshamy.kz
Osy kúni Nur-Sultan ýaqyty boıynsha saǵat 11:59-da Syrdarıa JES-i men 500 kV «Tashkent» QS-ny (Ózbekstan) qosatyn 500 kV joǵary vóltti áýe elektr jetkizý jelisiniń jelilik ajyratqyshynda qysqa tuıyqtalý oryn aldy. 500 kV shınalardyń 1-shi jáne 2-shi júıeleriniń dıfferensıaldy qorǵanystarynyń shamadan tys jumys isteýi Syrdarıa JES-inde generasıanyń aıtarlyqtaı tómendeýine, elektr stansasyna irgeles elektr jelisindegi ajyratylýlarǵa jáne Qazaqstannyń Birtutas elektr energetıkalyq júıesiniń (BEJ) 500 kV Soltústik-SHyǵys-Ońtústik tranzıtine 2 100 MVt mólsherindegi qýat júktemeden tys túsirilýine (belgilengen normadan 7 ese joǵary) ákeldi.
Júıeli apattar kezinde KEGOC AQ elektr jelileri men Qazaqstannyń ońtústigindegi elektr stansalarynyń avarıaǵa qarsy avtomatıkasy energıa júıesin bólý jónindegi talaptardy eskere otyryp, shtattyq rejimde iske qosyldy. Osy arqyly elimizdiń ońtústik tutynýshylarynyń shamamen 60%-yn elektrmen jabdyqtaýdy saqtaı otyryp, Qazaqstannyń ońtústik aımaǵy tutynýshylarynyń tolyq ajyratylýyna jol berilmedi. Bul rette Ózbekstan men Qyrǵyzstannyń energıa júıeleri tolyǵymen toqtan ajyratyldy.
KEGOC kompanıasyna apatty joıýǵa jáne Qazaqstandaǵy barlyq tutynýshylarǵa qoıylǵan shekteýlerdi alyp tastaýǵa 4 saǵat qajet bolǵanyn, sondaı-aq buǵan Qazaqstan BEJ-i Júıelik operatory personalynyń joǵary kásibı sheberliginiń nátıjesinde qol jetkizgenin atap ótken jón. Al Qyrǵyzstan UET-te sqema men rejim bir táýlikten astam ýaqyttan keıin qalpyna keltirilse, Ózbekstan UET-te tutynýshylardy energıamen jabdyqtaýdy qalpyna keltirý tórt kúnge sozyldy.