QR Energetıka mınıstri Erlan Aqkenjenov «QazMunaıGaz» UK AQ basshylyǵymen jáne Atyraý, Pavlodar, Shymkent munaı óńdeý zaýyttarynyń dırektorlarymen kezdesti.
Basqosýda 2040 jylǵa deıingi munaı óńdeý salasyn damytý tujyrymdamasyna sáıkes, óndiris qýatyn arttyrýǵa baǵyttalǵan jobalardy jedeldetý máselesi talqylandy, - dep habarlaıdy Aqshamnews.kz
Mańyzdy jıyn Memleket basshysynyń kómirsýtekterdi tereń óńdeý jáne ekonomıkanyń shıkizatqa táýeldiligin azaıtý jónindegi tapsyrmasyn iske asyrýǵa baǵyttalǵan. Sondaı-aq, Úkimet bekitken tujyrymdamaǵa sáıkes, elimizde munaı óńdeý kólemi jylyna 18 mıllıon tonnadan 39 mıllıon tonnaǵa deıin, ıaǵnı shamamen eki esege artady.
Jobalardyń basty sharty – janarmaı jáne munaı-hımıa óndirisin zamanaýı sqemamen júzege asyrý. Bul janarmaımen qatar joǵary suranysqa ıe munaı-hımıa ónimderin shyǵarýdy qamtamasyz etedi. Nátıjesinde ishki naryqty janar-jaǵarmaımen tolyq qamtyp, qosylǵan quny joǵary ónimderdiń eksporttyq áleýetin qalyptastyrýǵa múmkindik beredi.
Keńeste atalǵan zaýyttardyń jańǵyrtý jobalarynyń aǵymdaǵy jaǵdaıy men jumys kestesi jan-jaqty talqylandy. Mınıstr Shymkent MÓZ-iniń óndiristik qýatyn jylyna 6-dan 12 mln. tonnaǵa deıin ulǵaıtý jobasyn sheteldik seriktestermen jedel iske asyrý qajettigin atap ótti. Osy maqsatta Beıjińde CNPC kompanıasymen kelissózder júrgizý josparlanǵan. Sonymen birge mınıstr Pavlodar MÓZ-diń qýatyn 9 mln. tonnaǵa deıin kóterý jobasyn jyldam iske asyrýdy tapsyrdy. Al Atyraý MÓZ-inde óndiris kólemin jylyna 6,7 mln tonnaǵa deıin ulǵaıtý jáne zaýyttyń tıimdiligin arttyrý, sonymen qatar jóndeý aralyq kezeńderin uzartý jobalaryna erekshe nazar aýdarylýda.
«Árbir munaı óńdeý zaýytynyń qýatyn arttyrý jobasy meniń jeke baqylaýymda. Maqsatymyz suranysty qanaǵattandyrý ǵana emes, ony aldyn ala qamtyp, ekonomıkalyq senimdilikti qalyptastyryp, eldi tolyq otandyq ónimmen qamtamasyz etý. Mınıstrlik búrokratıalyq kedergilerdi joıýǵa jáne vedomstvoaralyq máselelerdi sheshýge qoldaý kórsetedi. Osy rette, «QazMunaıGaz» UK AQ men zaýyt basshylarynyń jedeldetilgen joba kestesin qatań baqylaýda ustap, jumyla jumys jasaýyn talap etemin», – dedi QR Energetıka mınıstri E.Aqkenjenov.
Keńes sońynda kompanıa basshylaryna jobalardyń jol kartalaryn jańartý tapsyryldy. Energetıka mınıstrligi olardyń oryndalýyn aı saıyn baqylap otyrady.
Jıyn qorytyndysynda vedomstvo basshysy sala mamandaryn Munaı-gaz kesheni qyzmetkerleri kúnimen quttyqtap, arnaıy nagradalar tabystady.
Aıta keteıik, «Munaı-gaz keshenin damytýǵa qosqan úlesi úshin» tósbelgisimen Atyraý MÓZ bas dırektory Qýanysh Bıshimov, Pavlodar MÓZ bas dırektory Májdaı Ahmetov, Shymkent MÓZ birinshi vıse-prezıdenti Baqyt Eregenov marapattaldy. Munaı-hımıa salasynda 15 jyldan astam eńbek etip, munaı tasymalyn ártaraptandyrýǵa úles qosqan Jibek Berdibekovaǵa «Munaı-gaz salasynyń qurmetti qyzmetkeri» tósbelgisi tabystaldy.