Almaty qalasy Alataý aýdanyndaǵy №156 jalpy bilim beretin mektepte "Birinshi synyp oqýshylaryn jaıaý júrginshiler qataryna qabyldaý" atty tárbıelik is-shara ótti.
Sharanyń maqsaty – bastaýysh synyp oqýshylaryna jolda ózin-ózi qaýipsiz ustaý daǵdylaryn darytyp, jol qozǵalysy erejelerin saqtaý mádenıetin qalyptastyrý, - dep habarlaıdy Aqshamnews.kz.
Baǵdarlama aıasynda balalarǵa arnalǵan jol júrý erejelerine qatysty ınteraktıvti sabaqtar uıymdastyrylyp, bilimderin bekitýge arnalǵan tájirıbelik tapsyrmalar oryndaldy. Sonymen qatar oqýshylar jol polısıasy qyzmetkerlerimen kezdesip, saltanatty túrde "Jas jaıaý júrginshi" antyn qabyldady.
- Balalardyń joldaǵy qaýipsiz júris-turys daǵdylaryn qalyptastyrý – jol-kólik oqıǵalarynyń aldyn alýdaǵy asa mańyzdy baǵyt. Biz árbir balanyń mektep tabaldyryǵyn attaǵan sátten bastap jol erejelerin túsinip, ony qurmetteı bilýin qalaımyz. Mundaı is-sharalar balalardyń óz qaýipsizdigine jáne aınalasyndaǵy adamdardyń amandyǵyna degen jaýapkershilik sezimin tárbıeleýge yqpal etedi, – dedi Almaty qalasy PD jergilikti polısıa qyzmeti basqarmasynyń bastyǵy Serik Shýmaev.
Almaty qalasy polısıa departamenti mundaı bastamalardyń "Profılaktıka" jyly aıasynda júzege asyp jatqanyn jáne balalar arasyndaǵy jol-kólik jaraqattaryn azaıtýǵa baǵyttalǵan keshendi jumystyń bir bóligi ekenin atap ótti.