Qazaqstannyń Energetıka mınıstrligi keıbir otyn túrleri Reseıden satyp alynyp jatqanyn rastady, dep habarlaıdy Almaty-akshamy.kz.
«İshki naryqta janar-jaǵarmaı materıaldarynyń qajet kólemin esepteı kele, munaı ónimderiniń jekelegen túrleri Reseıden ımporttalady. Bıtýmǵa qatysty toqtalsaq, 2023 jylǵy 19 shildede QR men Reseı Federasıasy arasyndaǵy Kelisim aıasynda RF-ten jylyna 300 myń tonnaǵa deıin bıtým jetkizýdi qarastyratyn Hattamaǵa qol qoıyldy», - delingen mınıstrliktiń habarlamasynda.
Jaýapta aıtylǵandaı, AI-95 benzınine baǵa suranys pen usynys negizinde retteledi.
«Jazǵy demalys kezeńiniń ereksheligin jáne osy kezdegi AI-95 benzınine suranystyń artýyn eskere otyryp, iri janarmaı quıý stansıalary jelileri ımport jasaýy múmkin ekenin mınıstrlik túsindirgen edi. Bul turǵyda Reseı Federasıasynyń Energetıka mınıstrligimen Indıkatıvtik teńgerim eskerilgen. Sonymen qatar, AI-95 baǵasyn memleket rettemeıdi. Sondyqtan janarmaı quıý beketterindegi baǵalar men satyp alý kólemi naryqtaǵy suranys pen usynysqa baılanysty ózgerýi múmkin», - dep atalyp ótken mınıstrlik aqparatynda.
Budan bólek, Energetıka mınıstrligi buǵan deıin órt qaýpi men ımporttyń kóp bolýyna baılanysty bıyldyń 14 maýsymy men 14 shildesi aralyǵynda (naryqtaǵy jaǵdaı turaqtanǵanǵa deıin) reseılik avıakerosındi temirjol kóligimen ákelýge tıisti shekteý engizilgenin eske saldy.
«Qazirgi kezde avıaotyn naryǵyndaǵy jaǵdaı turaqtandy. Joǵaryda aıtylǵandarǵa baılanysty, sondaı-aq áýejaılardan túsken ótinishterdi eskere otyryp, mınıstrlik reseılik avıakerosınniń ımportyna konvensıalyq tyıym salý merzimin uzartý týraly bastama kótermedi», - delingen vedomstvo jaýabynda.
Budan buryn habarlanǵandaı, Energetıka mınıstrligi Reseı Federasıasynan avıakerosın ımportyna nelikten tyıym salynǵanyn túsindirdi.