Áleýmettik jelilerde ene men kelinniń betashar rásimindegi áreketi qyzý talqyǵa túsip, jurtshylyqtyń ashýyn týdyrdy, dep habarlaıdy almaty-akshamy.kz.
Beınejazbada kelinniń betin ashqan úlken kisi shokoladtyń jartysyn ózi tistep, qalǵan jartysyn kelinine bergeni baıqalady.
Bul erekshe «tátti súıiske» etnograf Bolat Bopaı óz pikirin bildirdi.
- Ene men kelinniń aýyz jalasýy qazaqtyń yrym-tyıymynda joq. Qazaq ejelden densaýlyqqa, tazalyqqa erekshe mán bergen, er men áıeldiń oramalyn aýystyrmaǵan. Kelin men enege arnalǵan jeke oramaldary bolǵan. Vıdeony kórip otyryp, mundaı dástúrdiń bolmaǵanyn senimdi túrde aıta alamyn. Úndi kınolarynda qýanyshty sátterde kámpıtti bólisip jeıtinin kórgen edim. Bul ádetti solardan aldy ma, álde ózderi oılap tapty ma, bilmeımin. Mundaı áreket halyqtyń mádenıetine, dástúrine, yrym-tyıymdaryna qaıshy keledi, ǵasyrlar boıy qalyptasqan taǵylymdy buzý dep oılaımyn. Ekinshiden, dem men silekeı arqyly genniń aýysýy júredi. Úshinshiden, gıgıena turǵysynan juqpaly aýrýlardyń taralý qaýpi bar. Ene men kelinniń arasynda syılastyq bolý kerek. Men óz basym etnograf, el aǵasy retinde aıtarym - bolmaǵan nárseni salt-dástúr dep qabyldaýǵa bolmaıdy, - deıdi etnograf Bolat Bopaı.
Bul oqıǵa qoǵamda ártúrli pikirler týdyryp, dástúr men zamanaýı ádet-ǵuryptar arasyndaǵy shekarany anyqtaý máselesin taǵy da kóterdi.