Qazir kásipkerlerdiń shottary áleýmettik tólemder boıynsha 1 teńgeden astam qaryz bolǵan jaǵdaıda buǵattalyp jatady.
Osy oraıda Memlekettik kirister komıteti bul máselege qatysty túzetýler engizý josparlanyp jatqanyn habarlady.
Endi kásipkerlerdiń banktik shottary qaryzdardyń shamaly mólsherine baılanysty buǵattalmaıdy, dep habarlaıdy Almaty-akshamy.kz.
Aıta ketsek, salyq organdary salyq bereshegi 6 AEK-ten asatyn (2023 jyly 20 700 teńge) banktik shotqa tyıym sala alady. Alaıda áleýmettik tólemder boıynsha banktik shottarǵa tyıym salý 1 teńgeden astam bereshek boıynsha júrgiziledi. Sebebi bul uıym qyzmetkerleri boıynsha bereshek (olardyń zeınetaqy qorlaryna, MÁMS qoryna túsetin túsimder) bolyp eseptelinedi.
Memlekettik kirister komıteti elimizde kásipkerlikti qoldaý maqsatynda salyq bereshegi men áleýmettik tólemder boıynsha májbúrlep óndirip alý sharalaryn qabyldaý úshin shekti somany ulǵaıtý máselesi pysyqtalyp jatqanyn málimdedi.
«Kishigirim qaryzdar úshin banktik shottarǵa tyıym salýǵa jol bermeý úshin shottar boıynsha bereshek somalary sheginde shekteýler júrgizý usynylady. Iaǵnı bereshek 100 teńge bolǵanda – tek 100 teńge buǵattalady. Bul túzetýler banktik shottardaǵy barlyq aqshany buǵattaý máselesin sheshedi», delingen resmı habarlamada.