Qylmystyq kodekske para alýǵa kelisim bergeni úshin qylmystyq jaýapkershilikke tartýdy kózdeıtin jańa 366-1-baby engizilmek.
Ashyq NQA portalynda jarıalanǵan kodekstiń jańa redaksıasynda Sybaılas jemqorlyqqa qarsy is-qımyl agenttigi osyndaı bastama kótergen, dep habarlaıdy Almaty-akshamy.kz Astanatv.kz-ke silteme jasap.
«Memlekettik fýnksıalardy oryndaýǵa ýákilettik berilgen adamnyń ne oǵan teńestirilgen adamnyń nemese jaýapty memlekettik laýazymdy atqaratyn adamnyń ne laýazymdy adamnyń, sol sıaqty shet memlekettiń nemese halyqaralyq uıymnyń laýazymdy adamynyń para usynǵan nemese ýáde etken adamnyń nemese ol ókildik etetin adamdardyń paıdasyna jasaǵan áreketteri úshin para alýǵa kelisim berýi – belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyra otyryp, 1 000 AEK-ke (3 450 000 teńgege) deıin aıyppul salý, sol mólsherde túzeý jumystaryna ne 400 saǵatqa deıingi merzimge qoǵamdyq jumystarǵa tartýǵa ne 1 jylǵa deıin bas bostandyǵyn shekteýmen jazalanady», - delingen Ashyq NQA portalynda jarıalanǵan kodekstiń jańa redaksıasynda.
Qujatta kórsetilgendeı, para alýǵa kelisim berý túsinigi aýyzsha, nemese jazbasha nusqada jáne osyndaı áreketke barýǵa nıetin anyq ári naqty bildirýi, únsiz kelisim berýin meńzeıdi.
«Eger syılyqtyń quny 2 AEK-ten (6 900 teńgeden) aspasa, adamnyń óziniń mindetine kiretin jumystardy buryn oryndaǵany nemese qyzmet kórsetkeni úshin aldyn ala ýaǵdalastyq bolmaǵan kezde syılyq retinde birinshi ret materıaldyq syıaqy, jeńildik nemese múliktik sıpattaǵy qyzmetti, múlikke quqyqty alýǵa kelisim berýi mańyzy az bolýyna baılanysty qylmystyq quqyq buzýshylyq bolyp tabylmaıdy. Biraq ol tártiptik nemese ákimshilik jaýapkershilikpen qýdalanady. Para alýǵa kelisim bergen adam, eger ol quqyq qorǵaý organyna nemese arnaýly memlekettik organǵa para alýǵa kelisim bergeni týraly atalǵan organdarǵa osy fakt týraly belgili bolǵanǵa deıin óz erkimen habarlasa, qylmystyq jaýaptylyqtan bosatylatyn bolady», - dep kórsetilgen kodekstiń ózgeris engizilgeli otyrǵan nusqasynda.
Qujat 17 shildege deıin kópshilik talqylaýda bolady.