17 mekteptiń janynan jańa oqý ǵımarattarynyń qurylysy júrip jatyr
Bostandyq aýdanyndaǵy №199 gımnazıa janynan jańa korpýs paıdalanýǵa berildi. Qala kúninde lentasy qıylǵan ǵımarattyń ashylý saltanatyna ákim Baqytjan Saǵyntaev arnaıy keldi. Zamanaýı, halyqaralyq standarttarǵa saı jańa oqý ǵımaraty burynǵysynan 2 ese úlken, dep habarlaıdy Almaty-akshamy.kz Almaty.tv-ge silteme jasap.
№199 mamandandyrylǵan gımnazıa 2018 jyly burynǵy №2-inshi balalar úıiniń shaǵyn ǵımaratynda ashylǵan edi. Óner ordasy bar bolǵany 3 jyl ishinde joǵary nátıjelerge qol jetkizdi. Tıisinshe, qazir daryndy balalarǵa arnalǵan mektep jalpy qala aýmaǵynda úlken suranysqa ıe. Áý bastaǵy oryn tapshylyǵy máselesi jańa korpýstyń arqasynda túbegeıli sheshildi.
«Bizdiń gımnazıamyzǵa búkil qalanyń daryndy balalary oqýǵa keletindikten, burynǵy ǵımaratymyzda oryn jetpegen. Qazirgi tańda myna ǵımarat qosylǵannan keıin balalarǵa kelip, ótinish jasap, oqýǵa kelýge múmkindik týdy», – dedi №199 mamandandyrylǵan gımnazıanyń dırektory Sandýǵash Nyshanova.
Bilim oshaǵy edáýir úlkeıip, munda qazir 900-ge jýyq oqýshy bilim alady. Oqý ordasynda ıtalán tili men beıneleý óneri tereńdetilip oqytylady. Mekteptiń basty artyqshylyǵy munda biliktiligi joǵary muǵalimder jumys isteıdi.
Jańa ǵımarattyń ishinde qazaqstandyq jáne álemge áıgili sýretshilerdiń týyndylary ilingen. Balanyń shyǵarmashylyǵyn barynsha ashýǵa bar jaǵdaı jasalǵan. Al, mektepke qoly jete almaı júrgen turǵyndardyń qýanyshynda shek joq.
«Aldyńǵy kishkentaı mektepte balalar bir-birin kútip, sabaqtan kesh shyǵatyn. Endi qazir oryn kóp, mektep jańa, talaptarǵa saı. Endi balalarymyz keń jerde oqıdy jáne qosymshaǵa barýǵa ýaqyty bolady», – dedi ata-ana Aqmaral Saǵıbekova.
Jańa korpýsta kovorkıng zalymen qamtylǵan kitaphana bar. Onymen qosa, beıin pánder boıynsha keskindeme, sýret, músin, ıtalán tili kabınetteri zamanaýı quraldarmen jabdyqtalǵan.
«Bizdiń kezimizde zamanaýı quraldarmen jabdyqtalǵan synyptar bolǵan joq. Qazir mine halyqtyń talabyna saı, úlken memleketimizdiń josparyna baılanysty osyndaı mektepter salynýy kerek. Jańa ózderińiz kórgendeı, oqýshylarǵa búkil jaǵdaı jasalyp jatyr. Sonyń bári bizdiń jastarymyzdyń bolashaǵyna jumys jasaıdy», – dedi ardager ustaz Ásem Bespaeva.
Osylaısha, shaharda mektepterdegi oryn tapshylyǵy máselesi qarqyndy túrde sheshilip jatyr. Bıyl megapolıste 12 myń 600 orynǵa arnalǵan 8 jańa memlekettik bilim ordasy salynýda. Al, 17 mekteptiń janynan jańa oqý ǵımarattarynyń qurylysy júrip jatyr.
«Qalada 17 mekteptiń jańa korpýsy salynyp jatyr. Sonyń arqasynda 8263 oryn paıda bolady. Toǵyzy qoldanysqa berilip te qoıdy. Qalǵan 8 mektep bıyl qazan aıynyń sońyna deıin aıaqtalady. Sondaı-aq, osy oqý jylynda 11 jekemenshik mektep oqýshylarǵa esigin aıqara ashty», – dedi qalalyq bilim basqarmasy basshysynyń orynbasary Qaırat Jumanov.
Aıta keteıin, bıylǵy oqý jylynda 289 mektepte 300 myńnan asa oqýshy bilim alyp jatyr.