Budan buryn asyrap alǵan balalardy balalar úıine qaıtarýdyń jıilegeni aıtylǵan.
Qazaqstan bala asyrap alatyndarǵa talapty kúsheıtedi, dep habarlaıdy aqshamnews.kz
Tıisti túzetýlerdi senatorlar balanyń quqyqtaryn qorǵaý týraly zań jobasy aıasynda maquldady.
Senator Núrıa Nıazova Konstıtýsıalyq sot úılenbegen er adamdarǵa bala asyrap alýǵa tyıym salatyn normany zańsyz dep tanyǵanyn eske saldy.
«2024 jyly 23 shildede Konstıtýsıalyq sot nekede turmaǵan er adamdarǵa bala asyrap alý quqyǵyn shekteıtin neke, erli-zaıyptylyq jáne otbasy týraly kodekstiń 91-baby Konstıtýsıaǵa sáıkes kelmeıdi dep sheshti. Alaıda jyl saıyn balalarǵa qarsy qylmystar, sonyń ishinde jynystyq zorlyq-zombylyq kóbeıip keledi», - dep atap ótti Nıazova.
2024 jyly Qazaqstanda kámeletke tolmaǵandardyń jynystyq tıispeýshiligine qol suǵýdyń 890 jaǵdaıy tirkelgen. Bul byltyrǵy jyldyń sáıkes kezeńimen salystyrǵanda 8% artyq. Bas prokýratýranyń quqyqtyq statısıka jáne arnaıy esepke alý komıtetiniń málimetteri boıynsha, mundaı qylmystardyń 99% er adamdar jasaǵan.
Nıazova zań jobasynda erli-zaıyptylar úshin bala asyrap alýdyń basym quqyǵy qarastyrylýy kerek dep sanaıdy.
Oqý-aǵartý vıse-mınıstri Edil Ospan ázirlengen zań shynymen de erli-zaıyptylarǵa artyqshylyq beretinin aıtty. Budan basqa, birqatar qatańdatý sharalaryn engizý josparlanyp otyr:
Bala asyrap alýshy men bala arasyndaǵy jas aıyrmashylyǵyn anyqtaý.
Sottylyǵynyń bolýy týraly málimetterdi jyl saıyn jańartý.
Psıhologıalyq dıagnostıkadan mindetti túrde ótý.
Akkredıttelgen uıymdar arqyly oqytý.
«Atalǵan túzetýler qazir memlekettik organdarmen kelisý satysynda tur. Proses aıaqtalǵannan keıin olar Parlamentke engiziledi», -dedi vıse-mınıstr.