QR Eńbek jáne halyqty áleýmettik qorǵaý mınıstrliginde vedomstvo basshysy Svetlana Jaqypovanyń tóraǵalyǵymen alqa otyrysy ótti, onda 2024 jyldyń 10 aıyndaǵy jumys qorytyndylary men 2025 jylǵa arnalǵan josparlar talqylandy, dep habarlaıdy aqshamnews.kz.
Alqa otyrysyna vıse-mınıstrler, apparat basshysy, komıtet tóraǵalary, departament dırektorlary, ákimderdiń orynbasarlary, Eńbekmıniniń vedimistik baǵynysty uıymdarynyń, sondaı-aq elimizdiń barlyq óńirleriniń jumyspen qamtýdy úılestirý jáne áleýmettik baǵdarlamalar basqarmalarynyń, eńbek mobıldiligi ortalyqtarynyń basshylary qatysty.
Kún tártibinde 2025-2030 jyldarǵa arnalǵan ınklúzıvti saıasat tujyrymdamasyn qabyldaý jáne odan ári iske asyrý, arnaýly áleýmettik qyzmetter kórsetetin uıymdardyń qyzmetin lısenzıalaý, jumyspen qamtýǵa járdemdesý sharalaryn kórsetý jáne ataýly áleýmettik kómek (budan ári – AÁK) júıesin transformasıalaý máseleleri turdy.
Óz sózinde vıse-mınıstr Asqarbek Ertaev 2025 jylǵy 1 qańtardan bastap arnaýly áleýmettik qyzmetter kórsetetin uıymdardyń qyzmetin lısenzıalaý engiziletinin aıtty. Osy qyzmetterge tarıfterdi qalyptastyrý ádistemesiniń jobasy ázirlendi.
Sondaı-aq, 2025-2030 jyldarǵa arnalǵan ınklúzıvti saıasat tujyrymdamasynyń jobasy ázirlendi, ol Úkimet apparatynyń qaraýynda.
«Tujyrymdama jobasynyń tujyrymdamalyq jańalyǵy múgedektiktiń medısınalyq-áleýmettik-áleýmettik-quqyq qorǵaý modeline kóshý boıynsha jaǵdaılar jasaý bolyp tabylady. Inklúzıvti saıasatty iske asyrýdyń jańa tásilderi erekshe qajettilikteri bar adamdardyń qoǵamǵa tolyqqandy áleýmettik yqpaldasýy úshin jaǵdaı jasaýǵa baǵyttalǵan pármendi sharalar keshenin qabyldaýdy kózdeıdi. Tujyrymdama jobasy 13 baǵytty kózdeıdi jáne 56 is-sharadan turady», – dep atap ótti Ertaev.
Vıse-mınıstr Asqar Bıahmetov óńirlik jumyspen qamtý kartalary sheńberinde 804 myńnan astam adam jumysqa ornalastyrylǵanyn, onyń ishinde 260 myńy – Memleket basshysynyń «10 myń turǵynǵa 100 jańa jumys orny» bastamasy aıasynda jumysqa ornalastyrylǵanyn habarlady. Ol mınıstrlik zeınetaqy jarnalary men elektrondyq eńbek sharttary boıynsha derekterdi taldaı otyryp, aqparattyq júıeler arqyly apta saıynǵy jumysqa ornalasý monıtorıńin júrgizetinin atap ótti.
Budan basqa Jumysshy mamandyqtar jyly sheńberinde jumyskerler quqyqtaryn qorǵaý, jumysshy kadrlardy daıarlaý júıesin jetildirý, jumys berýshilerdi mamandardy oqytýǵa tartý, sondaı-aq jumysshy kásipteriniń bedelin arttyrý jónindegi sharalar josparlanǵan.
Ataýly áleýmettik kómek kórsetý tetikterin jetildirý jónindegi josparlar týraly vıse-mınıstr Oljas Anafın aıtyp berdi.
«Memleket basshysy azamattardyń shyǵystaryn eskere otyryp, AÁK kórsetý tásilderin qaıta qaraý mindetin qoıdy. Osyǵan baılanysty Otbasynyń sıfrlyq kartasyn paıdalana otyryp, memlekettik jáne memlekettik emes uıymdardyń júıelerimen ıntegrasıalaý arqyly AÁK-ti transformasıalaý úderisi júretin bolady. AÁK taǵaıyndaý tetigindegi aldaǵy ózgerister shyn máninde muqtaj azamattardy anyqtaýǵa jáne olarǵa memleket tarapynan nysanaly qoldaýdy qamtamasyz etýge múmkindik beredi», – dedi Oljas Anafın.
Memlekettik eńbek ınspeksıasy komıteti tóraǵasynyń m.a. Murat Muratbekov 10 aıda 4,5 myńnan astam tekserý júrgizilgenin, 7 myńnan astam buzýshylyq anyqtalǵanyn baıandady. Jumys berýshilerge 2 723 uıǵarym berilip, 339 mln teńge somasyna 3 207 ákimshilik aıyppul salyndy. Respýblıkamyzdyń 268 kásiporny 4,3 mlrd teńge somasyna jalaqy boıynsha bereshek ekeni anyqtaldy. Qabyldanǵan sharalardyń nátıjesinde 3,2 mlrd teńge tólendi, 16,6 myń qyzmetkerdiń quqyqtary qorǵaldy.
Otyrysty qorytyndylaı kele qatysýshylar jyl sońyna deıin sheshilýi tıis basty mindetterdi, sondaı-aq 2025 jylǵa josparlanǵan negizgi is-sharalardy talqylady. Áleýmettik qoldaý, qyzmetterdi sıfrlandyrý jáne jumyspen qamtýǵa járdemdesý sharalarynyń tıimdiligin arttyrýda basymdyqtar berildi.
Eńbek jáne halyqty áleýmettik qorǵaý mınıstri Svetlana Jaqypova qoıylǵan mindetterdi sapaly oryndaýdyń mańyzdylyǵyn atap ótip, olardy iske asyrýdyń ashyq monıtorıńin qamtamasyz etý qajettigine nazar aýdardy. Ol sondaı-aq azamattardy áleýmettik qorǵaýdy nyǵaıtýǵa, eńbek quqyqtaryn baqylaýdy kúsheıtýge jáne halyqtyń osal toptaryn qoldaý tetikterin jetildirýge baǵyttalǵan birqatar naqty tapsyrmalar berdi.