2025 jyl Qazaqstanda Jumysshy mamandyqtary jyly dep jarıalandy. Bul bastama aıasynda elimizdiń ár óńirinde, sonyń ishinde Abaı oblysynda, tehnıkalyq jáne kásiptik bilim berý salasyn damytýǵa erekshe nazar aýdarylýda. Óńirde zamanaýı bilim berý baǵdarlamalaryn engizý, jańa oqý baǵyttaryn ashý, sondaı-aq stýdentterdi jataqhanamen qamtamasyz etý sıaqty mańyzdy jobalar iske asyrylmaq, dep habarlaıdy Aqshamnews.kz..
Eńbek jáne halyqty áleýmettik qorǵaý mınıstrliginiń málimetinshe, aldaǵy alty jylda Qazaqstanda jumysshy mamandyqtary boıynsha 1,6 mıllıon maman qajet bolady. Onyń ishinde 400 myńǵa jýyq adam – kásiptik-tehnıkalyq bilim alǵan jumysshylar. Bul eńbek naryǵyndaǵy suranys tehnıkalyq jáne kásiptik bilim berý júıesin jańǵyrtýdyń mańyzdylyǵyn kórsetedi.
Qazirdiń ózinde mamandardy daıarlaý sapasyn arttyrý úshin 1,6 myń kásibı standart jańartylyp, bilim berý baǵdarlamalarynyń 87%-y solarǵa beıimdelgen. Mundaı qadamdar óńirlerdegi tehnıkalyq mamandyqtarǵa degen qyzyǵýshylyqty arttyryp, olardyń eńbek naryǵyndaǵy básekege qabilettiligin nyǵaıtady.
Abaı oblysy jumysshy mamandyqtaryn damytýda belsendi túrde alǵa qadam basýda. Geodezıa, kartografıa jáne qurylys joǵary kolejiniń dırektory Qanysh Tóleýov:
«Tehnıkalyq jáne kásiptik bilim berý salasynda biz úlken ózgerister kútemiz. Qazirgi tańda bizdiń kolejdegi mamandyqtar eńbek naryǵynda óte tapshy. Jańa baǵyttardy engizý arqyly biz oqytý sapasyn arttyrýǵa senimdimiz», — dep atap ótti.
Al IT jáne jańa tehnologıalar joǵary kolejiniń dırektory Oralhan Sartaev bul jyldy tehnıkalyq bilim berý júıesi úshin mańyzdy kezeń dep baǵalady:
«Prezıdenttiń sheshimi bilim berý júıesin jańǵyrtýǵa múmkindik beredi. Aldaǵy úsh jylda barlyq stýdentterdi jataqhanamen qamtamasyz etýdi kózdep otyrmyz. Jyl saıyn kolejden 250-ge jýyq túlek shyǵady, olardyń 90%-dan astamy jumysqa ornalasady», — dedi ol.
Abaı oblysynda jańa oqý baǵyttaryn ashý josparlanyp otyr. Búginde óńirdegi tehnıkalyq kolejderde geodezıa, kartografıa, qurylys, IT jáne jańa tehnologıalar sıaqty mamandyqtar oqytylýda. Bul mamandyqtar qazirgi ýaqytta eńbek naryǵynda joǵary suranysqa ıe.
Sonymen qatar, stýdentterdi jataqhanamen qamtamasyz etý máselesi de nazardan tys qalmaıdy. Aldaǵy úsh jylda ózge qalalardan kelgen barlyq stýdentterge jataqhana berý jospary júzege asyrylady. Bul – stýdentter úshin úlken qoldaý bolmaq.
Jumysshy mamandyqtary jyly – Qazaqstannyń tehnıkalyq jáne kásiptik bilim berý júıesin jańa deńgeıge kóterýge úlken múmkindik. Abaı oblysynda osy baǵytta qolǵa alynǵan jobalar aımaq ekonomıkasyn damytyp qana qoımaı, jastarǵa sapaly bilim men turaqty jumysqa ornalasý múmkindigin usynady. Bul qadamdar eńbek naryǵyn bilikti mamandarmen qamtamasyz etýge, eldiń óndiristik jáne ınovasıalyq áleýetin arttyrýǵa zor yqpal etedi.