Bıyl júz jasqa tolyp, ǵasyrmen qurdas atanyp otyrǵan keremet tulǵa – Sárýar Ǵanıqyzy Muhamadeevany óziniń tabysty eńbek jolymen jastardy shabyttandyrýdyń úlgisi deýge bolady. Ol ómiriniń jarty ǵasyrynda Jer qatynastary jáne jerge ornalastyrý jónindegi memlekettik ǵylymı-óndiristik ınstıtýtynda adal qyzmet etken aıaýly jan. Búgin mereıtoı ıesin burynǵy áriptesteri úıine baryp quttyqtap, densaýlyq tiledi.
Sárýar Muhamadeevanyń eńbek joly joǵary jaýapkershilikpen, kásibılikpen jáne adaldyqpen erekshelenedi. Eńbek kitapshasyndaǵy jalǵyz jazba onyń jer qatynastary jáne jerge ornalastyrý jónindegi memlekettik ǵylymı-óndiristik ınstıtýtynda 50 jyl boıy tabandy da tabysty eńbek etkenin kórsetedi. Osy ýaqyt ishinde ol jas mamannan áriptesteriniń qurmetine ıe bolǵan abyroıly, joǵary bilikti qyzmetkerge deıingi joldan ótti.
Sárýar Ǵanıqyzy jerge ornalastyrýda ınovasıalyq ádister men tehnologıalardy ázirleýge jáne engizýge eleýli úles qosty. Onyń kásibıligi men tájirıbesi ol qatysqan barlyq jobalarda tabysqa jetýdiń ajyramas faktorlary boldy. Onyń áriptesteri men basshylary onyń kásibılik, jaýapkershilik jáne uqyptylyq deńgeıin árqashan joǵary baǵalady.
Osyndaı jandy umytý múmkin emes. 100 jasap otyrǵan qarıa barlyq qurmetke laıyqty. Qazir Sárýar ájeı qyzy Láıla Kokýbaevanyń qamqorlyǵynda.
«Sárýar Ǵanıqyzy aınalasyndaǵy jandardyń otbasylyq jaǵdaıyna da alańdap, qamqor bolyp júretin. Qanshama jastyń materıaldyq jaǵdaıynyń jaqsarýyna ólsheýsiz úles qosty. Al ózine kelgende páter surap nemese derbes zeınetaqy alamyn dep umtylmaǵan jan. Bul qasıeti kópke úlgi bolýǵa tıis», – deıdi 40 jyldaı birge jumys istegen áriptesi Baqytkúl Dúısenbekova.
Al DAPOıKIR dırektory Bolat Jylqybekov: «Biz jerge ornalastyrý salasyna úles qosqan aǵa urpaq eńbegin umytpaımyz. Sárýar Ǵanıqyzy eńbek etken mekeme búginde «Azamattarǵa arnalǵan úkimet» memlekettik korporasıasy quramynda. Korporasıa basshylyǵy osy salaǵa jetekshilik etetin Basqarma tóraǵasynyń orynbasary Ǵalym Qarqynbaevtyń tapsyrmasymen ardagerimizdi mereıtoıymen quttyqtap, basshylyqtyń medali men quttyqtaýyn tapsyrdyq. Aǵa urpaqtyń ónegeli isi jastarǵa árkez úlgi jáne umytylmaq emes», – degen yqylasyn jetkizdi.