Shilde aıynda bos oryndar men jumys izdeýshiler arasyndaǵy alshaqtyq saqtaldy, al ornalastyrylǵan rezúmeler EEB-daǵy suranystyń tek 59%-yn ǵana qamtydy.
«Eńbek resýrstaryn damytý ortalyǵy» AQ málimeti boıynsha, shilde aıynda Elektrondyq eńbek bırjasynda 81,7 myń bos jumys orny jáne 47,9 myń rezúme ornalastyrylǵan, dep habarlaıdy Almaty-akshamy.kz
Maýsym aıymen salystyrǵanda, EEB-daǵy bos jumys oryndarynyń jalpy sany 15%-ǵa, al rezúmeler sany 3%-ǵa azaıdy. Jekelegen mamandyqtarǵa keletin bolsaq, bos jumys oryndary sanynyń eń eleýli ósýi saýalnama júrgizý jónindegi suhbattasýshy (+2,2 myń), hat almasý jónindegi kómekshi (+0,9 myń) jáne statıs (+0,6 myń) sıaqty kásipter boıynsha baıqaldy. Biliktiligi joq eńbekke baılanysty kásipter arasynda bos jumys oryndarynyń ósýi taýarlardy jınaqtaýshy, bazardaǵy satýshy jáne býyp-túıýshi turǵysynda atalyp otyr.
Sonymen qatar, ornalastyrylǵan rezúmelerdiń qarqyny kórsetkendeı, shilde aıynda kishi medısınalyq qyzmetkerler men mektep oqytýshylary arasynda belsendiliktiń artýy baıqalady. Máselen, bir aı ishinde EEB-daǵy feldsherler rezúmesiniń sany 421 birlikke, meıirgerler – 237 birlikke, bastaýysh synyp, shet tili, dene shynyqtyrý jáne sport muǵalimderi tıisinshe 283, 271 jáne 266 birlikke ósti. Pedagogıkalyq qyzmetkerler arasyndaǵy belsendilikti jańa oqý jylynyń jaqyndaýymen baılanystyrýǵa bolady.
EEB-daǵy rezúmeler men bos oryndar sanyn salystyrý, bilikti eńbek resýrstaryna suranystyń ózgergenin kórsetedi. Shilde aıynda kúzetshilermen, avtokólik júrgizýshilerimen jáne sanıtarlarmen qatar, saýalnama júrgizý boıynsha joǵaryda aıtylǵan suhbattasýshylarǵa (2595 bos orynǵa 48 rezúme), hat almasý boıynsha kómekshilerge (1 rezúme jáne 923 bos oryn) jáne statıserge (10 rezúme jáne 665 bos oryn) tapshylyq baıqaldy. Biliktilikti qajet etpeıtin eńbekke suranys ótken kezeńderdegideı ózgerissiz qaldy – EEB-de júk túsirýshilerdiń, qara jumysshylardyń, as úı jumysshylary men aýla sypyrýshylardyń jetispeýshiligi baıqalady.