QR Eńbek jáne halyqty áleýmettik qorǵaý mınıstrliginiń qyzmetkerleri megapolıster men oblys ortalyqtarynyń eńbek mobıldiligi ortalyqtarynyń basshylaryna arnaıy oqytý semınaryn ótkizdi. Dáris barysynda halyqqa qyzmet kórsetý jumystaryn jeńildetýge múmkindik beretin «Enbek sıfrlyq ekojúıesiniń» negizgi quraldary usynyldy, dep habarlaıdy Almaty-akshamy.kz.
EMO basshylary jumyspen qamtý salasynyń aqparattyq júıelerin paıdalaný jáne «Enbek sıfrlyq ekojúıe» platformalarymen (Enbek.kz elektrondyq eńbek bırjasy, Business.Enbek granttarǵa onlaın-ótinimderdi qaraý portaly, Hr.Enbek eńbek resýrstary portaly, Skills.Enbek onlaın-kýrstarynyń marketpleısi jáne t. b.) jumys isteý boıynsha teorıalyq jáne praktıkalyq daǵdylarǵa ıe boldy.
«Semınarǵa qatysýshylarǵa óńirlik deńgeıde jumys kúshine suranys pen usynysty taldaý, ári boljaý júrgizýdiń negizgi erekshelikteri úıretilip, jańa Ulttyq biliktilik júıesi men Career.Enbek sıfrlyq platformasyn engizý perspektıvalary týraly negizgi aqparat berildi», – dedi Eńbekmıni Halyqty jumyspen qamtý departamentiniń dırektory Asqar Nıazov.
Esterińizge sala keteıik, 2023 jyldyń 1 shildesinde Qazaqstanda eńbek mobıldiligi ortalyqtary quryldy. Olardyń negizgi mindeti oblystyń nemese respýblıkalyq mańyzy bar qalanyń eńbek naryǵyn úılestirý.
Óz kezeginde, jumys istep turǵan halyqty jumyspen qamtý ortalyqtary jumyspen qamtýǵa járdemdesý, erikti qonys aýdarý, ataýly áleýmettik kómek taǵaıyndaý boıynsha is maketterin qalyptastyrý boıynsha kórsetiletin qyzmetterdiń barlyq spektrlerin saqtaı otyryp, mansap ortalyqtary bolyp qaıta quryldy.