Elızabet úlken sporttan ketkenin málimdedi
Qazaqstandyq mánerlep syrǵanaýshy Elızabet Tursynbaeva sporttaǵy mansabyn aıaqtaǵanyn jarıa etti, dep habarlaıdy Almaty-akshamy.kz.
Elızabet Instagram-daǵy paraqshasynda sporttaǵy mansabyn aıaqtaýǵa jóninde sheshim qabyldaǵanyn jetkizgen. Mundaı sheshim qabyldaýyna arqasynan alǵan jaraqaty sebep bolǵanyn aıta kelip, ol uzaq ýaqyttan beri densaýlyǵyn mazalap júrgenin jasyrmaǵan.
«Osynyń saldarynan mamyr aıynyń sońyna deıin tolyqqandy jattyǵý jasaýǵa jaǵdaı bolǵan joq. Men úshin ómirimniń belgili bóligin aıaqtaý arqyly jańa qadamdarǵa aıaq bastym dep sanaımyn. Men Qazaqstanda júrmin. Jyl sońyna deıin balalarǵa ózimniń úırengen tájirıbemdi kórsetip, olardyń sheberligin arttyrýǵa kóńil bólmekpin. Men árqashan óz elimniń mánerlep syrǵanaý sportyn damytýdy josparlap keldim. Sol bir sát týdy dep sanaımyn», - dep jazdy sport sheberi.
Elızabet Tursynbaeva 2000 jyldyń 14 aqpanynda dúnıege keldi. 2019 jyly álem chempıonatynda kúmis júlde aldy. Bul jóninde sportshynyń ákesi Baıtaq Tursynbaev áleýmettik jelidegi paraqshasynda toqtaldy.
«Osy oraıda bizge qoldaý bildirgen Qyzylorda oblysy ákimdigine, Ulttyq Olımpıada komıtetine, elimizdiń mádenıet jáne sport mınıstrligine úlken rızashylyǵymyzdy bildiremiz. Sondaı-aq, Elızabettiń joǵary tabystarǵa qol jetkizýine úlken úles qosqan azamattarǵa alǵysymyzdy bildiremiz», - dep atap kórsetti.
Onyń aıtýynsha, Elızabet 2011 jyldan beri elimizdiń ulttyq quramasy sapynda 51 jarysqa qatysty. Halyqaralyq saıystarda barlyǵy 39 medalǵa qol jetkizdi. Olardyń 17-i altyn. Sońǵy on jyldaǵy sporttyq mansabynda Elızabet birde-bir halyqaralyq jarystardy qur jibergen joq. Degenmen keıingi jyly alǵan jaraqatynan ondaı dodalarǵa bara almady. Elızabet álem tarıhynda eresekter arasynda halyqaralyq jarystarda tórt aınalyp sekirýdi oryndaǵan alǵashqy mánerlep syrǵanaýshy retinde erekshelenedi.
Qazaqstan úshin álem chempıonatynda áıelder arasynda alǵashqy sportshy retinde baǵalanady. Oǵan qosa ol tórt qurlyq chempıonatynda, Azıa oıyndarynda, jasóspirimder arasyndaǵy Olımpıada oıyndarynda, Halyqaralyq ýnıversıadada júldegerler qatarynan kórindi.