Byltyr zańsyz júrgen 8 myńǵa jýyq sheteldik elden ketken
2024 jyly 22 naýryzda Máskeýdegi «Krokýs sıtı hol» ǵımaratynda terrakt bolyp, kemi 145 adam qaza tapty, 551 adam jaraqat aldy. Reseı bıligi lańkestik shabýyldy uıymdastyrdy dep Tájikstan azamattaryn qamaýǵa aldy. Osydan keıin Orta Azıadaǵy eńbek mıgranttary máselesi burynǵydan ózektene tústi. Azattyq Ruhy tilshisi Qazaqstandaǵy eńbek mıgranttarynyń sany, olardyń jumys isteıtin salalary týraly aqparat alý úshin QR Kóshi-qon polısıasyna suraý joldady, dep habarlaıdy almaty-akshamy.kz.
Quziretti organnyń málimetine súıensek, byltyr Qazaqstanda zańsyz júrgen 73,4 myń mıgrant ákimshilik jaýapkershilikke tartylǵan, onyń ishinde 7,7 myń adam elden shyǵarylǵan.
Qazaqstanǵa keletin eńbek mıgranttary qaı salada kóp jumys isteıdi?
Qazaqstanda 2023 jyly komersıalyq sektorda eńbek etý úshin sheteldik jumys kúshin tartýǵa 14 588 ruqsat berilgen eken. Elimizde jumys isteýge keteletinder qatarynda Qytaı azamattary kósh bastap tur:
- Qytaı – 4 161 adam;
- Úndistann – 1 253 adam;
- Túrkıa – 1 206 adam;
- Ózbekstan – 784 adam.
Olardyń kóbi qurylys, aýyl sharýashylyǵy, óńdeý ónerkásibinde eńbek etken. Atap aıtqanda:
- qurylysta – 3 544 adam;
- aýyl, orman jáne balyq sharýashylyǵynda – 1 661 adam;
- óńdeý ónerkásibinda – 1 387 adam;
- taý-ken ónerkásibi jáne karerlerdi qazý – 1 298 adam;
- kásibı, ǵylymı jáne tehnıkalyq qyzmette – 801 adam taǵy basqa salalarda qyzmet jasaǵan.
Qazaqstanda 300 myńǵa jýyq mıgrant úı sharýashylyǵynda jumys isteıdi
2023 jyly elimizge úı sharýashylyǵynda jumys isteý úshin 295 261 adam kelgen. Sonyń ishinde,
- Ózbekstannan – 278 894 adam;
- Tájikstannan – 13 334 adam;
- Ázirbaıjannana – 3 014 adam;
- Grýzıa – 16 adam;
- Ýkraına – 2 adam;
- Moldova – 1 adam kelgen.
Mıgrasıalyq polısıa 309 849 sheteldik Qazaqstanǵa kelip, berilgen ruqsatqa sáıkes eńbek etkenin, olardyń eshqaısysy jumyssyz qalmaǵanyn eske saldy.
İİM «qara naryqty» qalaı baqylap otyr?
Suraýhatymyzǵa jaýap bergen İshki ister mınıstrligi múddeli memlekettik organdarmen birlesip «qara naryqtaǵy» eńbek mıgranttaryn baqylaýdy iske asyrý úshin tıisti sharalar qabyldaıtynyn atap ótken.
«Polısıa departamentteri zańsyz júrgen sheteldikterdi anyqtaý úshin jumysty kúsheıtip, sondaı-aq sheteldik azamattar mingen kólik quraldaryn, onyń ishinde iri avtomobıl joldaryndaǵy avtobýstardy tekseredi. Bul rette, «Halyqtyń kóshi-qony týraly» QR Zańynyń 60-babyna sáıkes qabyldaýshy tulǵalardyń esebinen zańsyz ımıgranttardy elden shyǵarý tetigi qoldanylady», - dedi Kóshi-qon polısıasynan.
Jumys berýshiler eńbek mıgrantyn qabyldaýda qandaı talaptardy este saqtaǵany jón?
Qazaqstandaǵy jumys berýshiler sheteldik azamattardy jumysqa qabyldaǵan kezde, eńbek jáne kóshi-qon zańnamasynyń talaptaryn, sonyń ishinde:
- sheteldik qyzmetkerlerdi tartýǵa ruqsat alý;
- eńbek shartyn jasasý;
- kadrlarda jergilikti qamtýdy saqtaý;
- sheteldik jumyskerler úshin JTS tóleý;
- jalaqyny ýaqtyly tóleý jáne basqa da mindetterin.saqtaýy tıis. Áıtpese, aıyppul arqalaıdy.
«Sheteldik adamdy taksı júrgizýshisi retinde jumysqa ornalastyrý úshin Qazaqstan Respýblıkasynyń Kóshi-qon zańnamasyna sáıkes jergilikti atqarýshy organnan tıisti ruqsat alý qajet. Júrgizýshi kýáliginiń bolýyn baqylaýdy jumys berýshiler men ishki ister organdary júzege asyrady. Bul rette turaqty nemese ýaqytsha turýǵa ruqsatty Qazaqstan Respýblıkasynyń zańnamasynda belgilengen talaptar saqtalǵan kezde ishki ister organdary beredi», - delingen Kóshi-qon polısıasynyń habarlamasynda.