Almaty, Astana jáne Shymkentte 5G jelisin iske qosý josparlanǵan.
Sıfrlyq damý, ınovasıalar jáne aeroǵarysh ónerkásibi vıse-mınıstri Asqat Orazbek jańa jıiliktiń qashan paıdalanýǵa beriletini týraly málim etti, dep habarlaıdy Almaty-akshamy.kz
Onyń aıtýynsha, 2022 jyldyń sońynda respýblıkalyq mańyzy bar úsh qalada – Almaty, Astana jáne Shymkentte 5G jelisin iske qosý josparlanǵan.
«Bul - joǵary jyldamdyqty qajet etetin iri bıznes abonentteri. Bul – óte kóp vıdeo qaraıtyn, jaqsy, sapaly baılanysty qajet etetin áleýmettik jeli qoldanýshylary. Halyqaralyq zertteý mobıldi tehnologıalardy engizý qarqyny men halyq pen bıznestiń ekonomıkalyq belsendiliginiń tikeleı baılanysy bar ekendigin kórsetip otyr. 4G tehnologıasyn engizgen kezde jáne onyń qarqyndy damyǵan ýaqytynda halyqqa, bızneske qandaı paıda ákelgenin kórip otyrmyz. 5G 2025 jylǵa deıin elimizdiń barlyq oblys ortalyǵyna taratylatyn bolady», - dedi Asqat Orazbek.
5G jıiligin taratý boıynsha ótken aýksıonda «Mobaıl telekomservıs» JSHS men «Ksell» AQ jeńiske jetti. Olar tıisti tólem jasaǵannan keıin radıojıilikti paıdalanatyn bolady.