Olar óz kinálaryn moıyndap, istegen isterine ókindi.
Qalanyń Bostandyq aýdanynyń polıseıleri meshitte jasalǵan jeti urlyqtyń betin ashty, dep habarlaıdy Almaty-akshamy.kz Polisia.kz-ke silteme jasap.
«Jedel izdestirý is-sharalary barysynda 29 jáne 34 jastaǵy jumyssyz er adamdar ustaldy. K.esimdi azamattyń bes qylmysqa qatystylyǵy dáleldendi, onyń «áriptesi» E.esimdi azamat zańsyz áreketterdiń eki deregin jasaǵan. Eki aıyptalýshy da shahardyń iri meshitteriniń birinde birneshe urlyq jasaǵan. Zardap shekkenderdiń aıtýynsha, olar namaz kezinde telefondaryn aıaqtarynyń astyna edenge qoıǵan. Namazdan keıin olar telefondaryn joǵaltqanyn baıqaǵan. Ustalǵandar urlyqqa qatysy baryn joqqa shyǵarmaıdy. Olar óz kinálaryn moıyndap, istegen isterine ókindi. Qylmystyq is QR QK-niń 188-baby boıynsha tirkeldi. Kúdiktilerdiń qalanyń basqa da aýdandarynda jasalǵan osyǵan uqsas qylmystarǵa qatysy bar-joǵyn tekserýdemiz. Qazirgi ýaqytta qajetti tergeý amaldary júrgizilip jatyr», – dedi Bostandyq aýdandyq polısıa basqarmasynyń bastyǵy Maqsat Qanapáev.
