Magnýs Karlsen: Men shahmat jáne óz oıynymnyń strategıasy týraly eshqashan oıymnan shyǵarǵan emespin

Magnýs Karlsen jýrnalıserdiń suraqtaryna jaýap berdi

Almatyda shahmattyń rapıd jáne blıs túrleri boıynsha 2022 jylǵy álem chempıonatynyń resmı ashylýynan keıin Óńirlik komýnıkasıalar qyzmetinde ótken baspasóz máslıhatyna belgili norvegıalyq shahmatshy, shahmattan qazirgi álem chempıony Magnýs Karlsen qatysty, dep habarlaıdy Almaty-akshamy.kz.

Shahmatshy almatylyqtarǵa qonaqjaılylyǵy úshin alǵysyn bildirdi, ózine qazaqtyń ulttyq shapany syıǵa tartylǵanyn tilge tıek etti. Magnýstyń aıtýynsha, bul «Qazaqstanǵa qosh keldińiz!» degen anyq ári bir mándi habarlama boldy.

Magnýs Karlsen jýrnalıserdiń suraqtaryna jaýap bere otyryp, sońǵy jyldary búkil álemde, sondaı-aq Qazaqstanda zıatkerlik oıynǵa qyzyǵýshylyq aıtarlyqtaı artqanyn atap ótti. Onyń pikirinshe, bul qubylystyń birqatar sebepteri bar.

«Eń aldymen, kovıd pandemıasy bolǵanyn bárimiz bilemiz, sondyqtan kóptegen adamdar tórt qabyrǵaǵa qamalyp, úıde otyrýǵa májbúr boldy. Shyn máninde, shahmat ıntellektýaldy oıynǵa aınaldy, ony oınaý úshin adamnyń qaı jerde júrgeni mańyzdy emes, úıde de oınaýǵa bolady. Sondaı-aq, «Patshaıym júrisi» serıaly úlken tanymaldylyqqa ıe boldy, ol da shahmatty tanymal etýde ról atqardy. Sonymen qatar, sońǵy ýaqytta adamdar tek saý denege ǵana emes, oıdyń saýlyǵyna da umtylady. Shahmat – psıhıkalyq densaýlyqty saqtaýdyń tamasha tásili», - dep Magnýs Karlsen shahmatqa degen qyzyǵýshylyqtyń artýynyń sebepterin atady.

Sondaı-aq chempıon kóptegen shahmatshylardyń kásibı psıhologtardyń qyzmetine júginetinin aıtty. Biraq ózi úshin ol muny qajet dep sanamaıdy, biraq áriptesteriniń psıhologtarmen qarym-qatynasyn joǵary baǵalaıdy.
«Men ózimniń ne istep jatqanymdy, qarsylastarymnyń ne istep jatqanyn jáne ár oıynda meniń joǵaryǵa kóterilýim men quldyraýyma ne sebep bolatynyn jaqsy túsinemin. Árıne, men júginip, keńes alatyn jaqyn adamdarym bar, biraq eshqashan psıhologtarǵa júginbeppin», - dep jaýap berdi Magnýs.
Ol jýrnalıserge chempıonatqa qalaı daıyndalatynyn da aıtyp berdi.
«Bul óte jeke, mende dál osylaı jasaımyn dep oılaǵan, naqty anyqtalǵan strategıa joq. Men shahmat týraly oılaýdy eshqashan toqtatqan emespin. Bul - únemi menimen ómir súretin nárse. Men qalaı oınaımyn, kimmen oınaımyn dep oılaımyn. Ne isteý kerek jáne ne istemeý kerektigi týraly kásipqoılar bólisetin jalpy keńester bar. Tutastaı alǵanda, olar bulyńǵyr, eń bastysy, basta máseleni sheshýge degen umtylys bolýy kerek. Men osylaı daıyndalamyn. Shahmat meni ımprovızasıalaýǵa jáne oılanýǵa jeteleıdi», - dedi Magnýs Karlsen.
Sózin qorytyndylaı kele, álemdik shahmat juldyzy bul týrnırde úlken tartysty oıyn bolatynyn atap ótti.