"Barlyq quraldardy paıdalaný qajet": Álıhan Smaıylov azyq-túlik baǵasyn ustap turý týraly
Úkimettiń sıfrlyq keńsesinde QR Premer-Mınıstri Álıhan Smaıylov áleýmettik mańyzy bar azyq-túlik taýarlarynyń (ÁMAT) baǵasyn ustap turý máseleleri jóninde keńes ótkizdi, dep habarlaıdy Almaty-akshamy.kz Primeminister.kz-ke silteme jasap.
Óńirler boıynsha eń joǵary baǵa ósimi ótken aptada Qaraǵandy oblysynda 0,4%, taǵy 11 óńirde – Nur-Sultan jáne Shymkent qalalarynda, Mańǵystaý, Aqtóbe, Aqmola, Qostanaı, Qyzylorda, Batys Qazaqstan, Soltústik Qazaqstan, Almaty jáne Túrkistan oblystarynda 0,3% tirkeldi.
QR Saýda jáne ıntegrasıa mınıstrliginiń Saýda komıtetiniń tóraǵasy Erjan Qazanbaevtyń aıtýynsha, «aınalym sqemasy» quralynyń monıtorıńi bekitilgen qarjylandyrý josparynyń tolyq qamtylmaǵanyn kórsetedi.
Salalyq vedomstvo bólshek saýda obektileriniń ruqsat etilgen saýda ústemesin saqtaýy boıynsha jergilikti atqarýshy organdardyń jumysyn úılestirýdi jalǵastyrýda. Ótken aptada reıdtik is-sharalardyń nátıjesinde úı mańyndaǵy 33,6 myń dúken nemese saýda obektileriniń 78,9%-y qamtyldy, 424 buzýshylyq anyqtaldy. Sonyń nátıjesinde saýda ústemeleri 15%-ǵa tómendedi.
Aýyl sharýashylyǵy mınıstrliginiń derekterine sáıkes, respýblıka boıynsha ÁMAT qory shamamen 744 myń tonnany quraıdy, onyń ishinde «aınalym sqemasy» aıasyndaǵy qorlar – 108 myń tonna, turaqtandyrý qorlarynda – 25,6 myń tonna jáne 52,9 myń tonnaǵa forvardtyq kelisimsharttar jasaldy.
Aýyl sharýashylyǵy mınıstrligine ákimdiktermen birge óńirler arasynda aýyl sharýashylyǵy ónimderiniń qajettilikterin eskere otyryp, olardy jedel tártippen jetkizip otyrý úshin óndiris pen tutyný teńgerimin turaqty negizde ózektendirý tapsyryldy.
«Búgingi tańda ońtústik óńirlerde kókónisterdiń keıbir túrleri pisip jatyr. Baǵasy ósip jatqan kókónisterdi jetkizýge kelisimshart jasaý qajet. Sonymen qatar kúzde turaqtandyrý qorlarynda salystyrmaly túrde tómen baǵamen qajetti azyq-túlik kólemi bolýy úshin forvardtyq satyp alý boıynsha qarjylandyrýdy arttyrý qajet. Bul jumysty búginnen bastap júrgizgen jón», — dedi Á. Smaıylov oblys ákimderine.
Sonymen qatar Premer-Mınıstr Saýda jáne ıntegrasıa mınıstrligine oblys ákimdikterimen birlesip, saýda ústemesin, ásirese, ony kóterme saýda oryndarynda baqylaýǵa erekshe nazar aýdarýdy, sondaı-aq «aınalym sqemasyn» qarjylandyrýdy 100% nysanaly deńgeıge deıin jetkizýdi tapsyrdy.
«Inflásıa máseleleri halyqtyń áleýmettik kóńil-kúıine áser etedi, ol kúndelikti baqylaýda bolýy tıis. Ákimderdiń osy baǵytqa jetekshilik etetin orynbasarlary jaǵdaıdy baqylap, tıisti sharalar qabyldaýy qajet. Bizde qajetti quraldar bar», — dep túıindedi Álıhan Smaıylov.