Muǵalim tapshylyǵy baıqalatyn eldiń úsh óńiriniń árqaısysynda 600-ge deıin bos oryn bar
Elimizde mektep ustazdary jetkiliksiz óńirler belgili boldy, dep habarlaıdy Almaty-akshamy.kz.
«Pedagog defısıtine kelsek, bıyl qyrkúıektegi jaǵdaı boıynsha elimizde 3 myńnan astam jumys orny bos tur. Búginde Qazaqstanda 350 myńdaı muǵalim baryn eskersek, salystyrmaly túrde 3 myńdy asa úlken tapshylyq dep oılamaımyn. Muǵalimderdiń jetispeýshiligi kóbinese aýyldyq jerlerdegi shaǵyn mektepterde baıqalady. Shaǵyn mektepterdegi pedagog tapshylyǵy ondaǵy júktemeniń azdyǵynan týyndap otyr. Muǵalim tapshy 3 aımaqty aıtar bolsam, aldymen Atyraý oblysy, ekinshi kezekte Almaty oblysy jáne úshinshi orynda Túrkistan oblysy», - dedi QR Bilim jáne ǵylym mınıstrli Asqat Aımaǵambetov Úkimet úıinde onlaın ótken baspasóz máslıhatynda.
Mınıstrdiń málimdeýinshe, joǵaryda atalǵan ár óńirde 600-ge deıin bos jumys orny bar.
«Kez kelgen máseleniń eki jaǵy bar. Memleket basshysy tapsyrǵan 1000 mektep salýǵa kelsek, jańa mektep salǵan soń, oǵan qajetti mamandardy da daıarlaý kerek. Bul oraıda pedagogıka mamandyqtaryna bólinetin grant sany jyl sanap artyp keledi. Sondaı-aq, muǵalimderdi daıarlaýda oqý baǵdarlamasyna ózgerister engizildi. Jalpy aıtqanda, búginde elimizde pedagog tapshylyǵyn sheshýge arnalǵan keshendi júıe bar», - deıdi ol.