Halyqaralyq standarttaý uıymynyń ISO 3166-2 standartyna sáıkes «KAZ» jáne «KZ» geokodtary resmı túrde Qazaqstan Respýblıkasyn belgileıdi.
Bul kodtar ınternet domenderinde, memlekettik qujattarda, esep berý qujattarynda jáne nómirlerde keńinen qoldanylady. Olar el ishinde de, shetelde de tanymal. Osyǵan baılanysty Qazaqstanda halyqaralyq jáne respýblıkalyq mańyzy bar avtomobıl joldary úshin «KAZ» jáne «KZ» ındeksteri bekitildi, dep habarlaıdy aqshamnews.kz.
«KAZ» ındeksi birneshe óńir arqyly ótetin 23 avtomobıl jolyna berilgen. Máselen, Astana men Almatyny jalǵap, Qaraǵandy arqyly ótetin jol KAZ01 ındeksin enshilese, «Astana – Kókshetaý (aınalma jolmen) – Petropavl – RF shekarasy («Jańa jol» ótkizý pýnkti)» baǵyty KAZ02 bolyp belgilendi.
«KZ» ındeksi bir óńirdiń sheginde ornalasqan respýblıkalyq mańyzy bar 88 jol úshin qoldanylady. Máselen, Aqtóbe oblysyndaǵy «Qandyaǵash – Embi – Shalqar – Yrǵyz» tasjoly KZ04-02 ındeksin aldy. Onda kórsetilgen «04» nómiri – óńirdi, al «02» nómiri – oblys shegindegi joldyń rettik nómirin kórsetedi. Jambyl oblysyndaǵy «Merki – Shý – Býrylbaıtal» avtomobıl joly KZ08-04 dep belgilendi, mundaǵy «08» – óńirdi, al «04» — oblys shegindegi joldyń nómirin bildiredi.
«E» jáne «AN» sıaqty halyqaralyq kelisimder arqyly taǵaıyndalǵan avtomobıl joldarynyń ındeksteri ózgerissiz qalatyn bolady. Bul halyqaralyq kólik júıesindegi júıelilik pen tranzıttik qozǵalys jaılylyǵyn qamtamasyz etedi.
Avtomobıl joldarynyń tizimi, ataýlary jáne ındeksterimen myna silteme boıynsha tanysýǵa bolady: https://adilet.zan.kz/rus/docs/V1500011402.Jańa ındeksteý júıesin ázirleýdi «Qazaqstan jol ǵylymı-zertteý ınstıtýty» AQ júzege asyrdy.Jańa ındeksterdi eskere otyryp, jol belgilerin jańartý josparly jumystardyń oryndalýyna jáne tozǵan elementterdiń aýystyrylýyna qaraı birtindep atqarylady. Bul úshin qosymsha qarajat talap etilmeıdi, jumystar joldardy kútip ustaý sheńberinde júrgiziledi.
