Qazaqstandaǵy sý qoımalardyń bestigi.
Almaty oblysyndaǵy Qapshaǵaı sý qoımasy aýdany boıynsha ekinshi orynda. Bul týraly Sý jáne ırrıgasıa mınıstrligi aqparat jaıalady, dep habarlaıdy Almaty-akshamy.kz.
5 ORYN. Sergeev sý qoımasy
Soltústik Qazaqstan oblysyndaǵy Sergeev sý qoımasy elimizdegi eń úlken sý qoımalarynyń «bestigine» kiredi. Onyń aýdany - 117 sharshy shaqyrym, kólemi - 693 mln. tekshe metr. Ortasha tereńdigi – 5,9 m. 1969 jyly qoldanysqa berilgen sý qoımasy uzaq jyldar boıy sý aǵynyn rettep keledi. Munda Sergeev GES ornalasqan. Sý qoımasy óńirdiń energetıkalyq jáne komýnaldyq-turmystyq qajettilikterin, sonymen qatar ırrıgasıa júıelerin sýmen qamtamasyz etip otyr. Sol sebepti soltústik óńir ekonomıkasy úshin asa mańyzdy nysan sanalady.
4 ORYN. Shúlbi sý qoımasy
Shyǵys Qazaqstan oblysyndaǵy Shúlbi GES bógeti qalyptastyrǵan Shúlbi sý qoımasy búgingi reıtıńte tórtinshi orynǵa ornalasty. Buqtyrma jáne Shúlbi GES arasynda ornalasqan nysan janama aǵyndy maýsymdyq retteýdi qamtamasyz etedi. Sý qoımasynyń jalpy aýdany - 255 sharshy shaqyrym, kólemi - 2,39 tekshe shaqyrym.
3 ORYN. Shardara sý qoımasy
Syrdarıa ózeninde ornalasqan Shardara sý qoımasy 1967 jyly paıdalanýǵa berildi. Aýdany - 783 sharshy shaqyrym, ortasha tereńdigi - 6,3 metr bolatyn sý qoımasy Túrkistan oblysynyń sý sharýashylyǵy júıesiniń ajyramas bóligi bolyp tabylady. Ol aǵyndy rettep qana qoımaı, aımaqtyń energetıkalyq jáne ırrıgasıalyq qajettilikterin óteıdi. Sondaı-aq Shardara qalasyn aýyz sýmen qamtamasyz etip otyr.
2 ORYN. Qapshaǵaı sý qoımasy
Almaty oblysyndaǵy İle ózeninde ornalasqan Qapshaǵaı sý qoımasy aýdany boıynsha ekinshi orynda. İle ózeniniń aǵynyn retteý úshin salynǵan sý qoımasy negizgi qyzmetimen qatar ırrıgasıalyq, balyq ósirý jáne rekreasıalyq maqsattarǵa da paıdalanylady. Qoımaǵa sý jiberý 1970 jyly bastaldy. Búginde onyń aýdany - 1847 sharshy shaqyrym, kólemi - 18,14 tekshe shaqyrym. Sý qoımasyna Túrgen, Shilik, Esik, Talǵar, Qaskeleń ózenderi de quıady. Qapshaǵaı sý qoımasy aımaqtyń kórikti ári týrısik oryndarynyń biri sanalady. Sondaı-aq ekonomıkanyń túrli salalary úshin sý resýrsynyń mańyzdy kózi.
1 ORYN. Buqtyrma sý qoımasy
Qazaqstandaǵy aýdany boıynsha eń úlken sý qoımasy - Buqtyrma . Onyń aýdany - 5490 sharshy shaqyrym, ortasha tereńdigi - 9,6 m. Ertis ózenindegi Buqtyrma GES bógeti qurǵan sý qoımasy 1967 jyly qoldanysqa berildi. Nysan energetıka, sý kóligi, ónerkásip, balyq jáne aýyl sharýashylyǵy, aýyz sý qajettilikterin retteıtin kóp fýnksıaly rezervýar bolyp tabylady. Budan bólek, Buqtyrma sý qoımasy uzaq jyldar boıy Ertis aǵynyn turaqtandyrýda mańyzdy ról atqarady. Osy arqyly sý kóliginiń qozǵalysyna qolaıly jaǵdaı jasaıdy.