Jezqazǵanda bes dúrkin álem chempıony, grosmeıster Jansaıa Ábdimáliktiń shahmat akademıasynyń fılıaly jumysyn bastady, dep habarlaıdy aqshamnews.kz.
Ashylý rásimine QR Týrızm jáne sport mınıstri Erbol Myrzabosynov, Ulytaý oblysynyń ákimi Dastan Rysbekov, «Qazaqmys korporasıasy» JSHS basqarma tóraǵasy Nurahmet Nýrıev qatysty. Atalǵan fılıal elimizdegi eń úlken akademıa atanyp otyr. Ǵımarattyń jalpy aýdany 900 sharshy metr. Munda oblystyń 5-18 jas aralyǵyndaǵy 1000-ǵa jýyq jas shahmatshy bilim alady.
«Ult uıasy – Ulytaýda sizdermen qaýyshqanyma qýanyshtymyn. Barlyǵyńyzdy akademıanyń ashylýymen shyn júrekten quttyqtaımyn. Memleket basshysy sport salasyna erekshe kóńil bólýde. Nátıjesinde sportshylarymyz álemdik dodalarda árqashan bıikten kórinip keledi. Shahmatta bizdiń sportshylar álemdik dodalarda óte joǵary nátıje kórsetip júr. Elimizde 8 myńnan astam shahmat úıirmeleri jumys isteıdi. 270 myńnan astam bala shahmatpen aınalysady. Jansaıanyń ózi halyqaralyq grosmeıster. Álemdik arenada top jaryp, óziniń sporttaǵy jolynan bólek, balalardy sportqa baýlyp, olarǵa jol ashyp jatyr. Keleshekte osyndaı akademıalardan álemdik dodalardy baǵyndyratyn sportshylardyń ósip shyǵatynyna senimdimin», - dedi Týrızm jáne sport mınıstri Erbol Myrzabosynov.
Ashylý saltanatynda Ulytaý oblysynyń ákimi Dastan Ryspekov óńirimizden tanymal shahmatshylar men el chempıondary shyǵyp, Ulytaý oblysyn tek respýblıkalyq deńgeıde ǵana emes, álemdik arenada da tanystyratynyna senim bildirdi. Jezqazǵandaǵy shahmat akademıasy Qazaqmys korporasıasy men Ulytaý oblysy ákimdigi arasyndaǵy memorandým aıasynda salynǵan. Bul elimizde sport pen bilim berýdi damytý úshin bıznes pen memlekettik uıymdar arasynda yntymaqtastyqtyń mańyzdy ekenin kórsetedi. Sonymen qatar, akademıanyń ashylýy aıasynda «KAZAKHMYS YOUTH TEAM CHESS CUP» atty alǵashqy halyqaralyq balalar komandalyq týrnıri uıymdastyryldy. Bul jarysqa Qazaqstan, Reseı, Belarýs, Qyrǵyzstan jáne Mońǵolıadan kelgen 100-den astam jas shahmatshy qatysty.