Sý resýrstary jáne ırrıgasıa mınıstrligi elimizdegi eń iri toptyq sý qubyrlary jaıly aqparat usyndy, dep habarlaıdy aqshamnews.kz.
Aral-Sarybulaq toptyq sý qubyry. Jalpy uzyndyǵy - 2583,53 shaqyrym. Tolaǵaı jerasty qoınaýynan sý tasymaldaıtyn toptyq sý qubyry 1986 jyly qoldanysqa berildi. Búgingi tańda Qyzylorda oblysyndaǵy 163 myńnan astam turǵyny bar 61 aýyldy aýyz sýmen qamtamasyz etip otyr.
Býlaev toptyq sý qubyry. Jalpy uzyndyǵy - 2027,64 shaqyrym. 1962 jyly paıdalanýǵa berilgen qubyr táýligine 60 myń tekshe metr sý jibere alady. Toptyq sý qubyry Sergeev sý qoımasynan bastalyp, Soltústik Qazaqstan oblysynyń 6 aýdany: Qyzyljar, Aqjar, Aqqaıyń, M.Jumabaev, Taıynsha jáne Mamlút arqyly ótedi. Búgingi tańda 95 myńnan astam turǵyny bar 136 aýyldy sýmen qamtamasyz etip otyr.
Saryaǵash toptyq sý qubyry. Jalpy uzyndyǵy – 896,60 shaqyrym. 2004 jyly qoldanysqa berilgen toptyq sý qubyry Keles ózeni men Tashqulaq kanalynan sý alady. Búgingi tańda 147 myńnan astam halqy bar 30 eldi mekendi aýyz sýmen qamtamasyz etip otyr.
Kamenskıı toptyq sý qubyry. Jalpy uzyndyǵy – 307,414 shaqyrym. Oral qalasynyń ońtústigindegi Serebrákov jerasty qoınaýynan sý jetkizý úshin salynǵan toptyq sý qubyry 1982 jyly paıdalanýǵa berildi. Búgingi tańda 25 myńǵa jýyq turǵyny bar 19 eldi mekendi aýyz sýmen qamtyp otyr.
Jáırem-Qarajal toptyq sý qubyry. Jalpy uzyndyǵy – 117,4 shaqyrym. Tuzkólden sý tartý maqsatynda salynǵan toptyq sý qubyry 2019 jyly paıdalanýǵa berildi. Búgingi tańda ol 174 myńǵa jýyq adamdy aýyz sýmen qamtamasyz etedi.