Jeke ınvestorlarǵa zańdy tulǵalardyń qaryzdaryn satyp alýǵa ruqsat etilmek
Májiliste osyny kózdeıtin zań jobasy maquldandy, dep habarlaıdy Almaty-akshamy.kz Qazaqtn.com saıtyna silteme jasap.
Qarjy naryǵyn retteý jáne damytý agenttiginiń tóraǵasy Mádına Ábilqasymovanyń sózinshe, bul jańashyldyq tek zańdy tulǵalardyń qaryzyn satyp alýǵa baǵyttalǵan. Maqsat qarjy ınstıtýttary boryshkerden nesıe qaryzy esebinen óndirip alǵan múlikti ekonomıkalyq aınalymǵa tartý. Sebebi, kepildikke alynǵan jer telimderi men óndiristik jáne komersıalyq baǵyttaǵy nysandar jyldar boıy turalap qalǵan. Búginde mundaı strestik aktıvterdiń jalpy quny 1 trıllıon teńgeden asyp jyǵylǵan.
"Qazirgi ýaqytta bankter men mıkroqarjy uıymdary osyndaı óndirip alynǵan múlikti 5 jylǵa deıin ózderiniń balanstarynda ustaıdy. Osy ýaqytta múlik ekonomıkalyq aınalymǵa tartylmaıdy. Sol sebepti, osy zańda taǵy bir novela bar. Úsh jylǵa deıin osy merzim qysqartyldy. Osy úsh jyl ishinde bankter osyndaı óndirip alynǵan múlikti tezirek satý kerek. Olar ony satpaǵan jaǵdaıda biz olarǵa qadaǵalaý sharalaryn qoldanatyn bolamyz", - deıdi QR qarjy naryǵyn retteý jáne damytý Agenttiginiń Tóraǵasy Mádına Ábilqasymova.
Jalpy zań jobasynda kásipkerdiń qaryzyn satyp alý quqyǵyna ıe bolatyn ınvestorlarǵa shekteý qoıylmaǵan. Tipti shetel azamaty da ıemdenýi múmkin. Alaıda, jerge qatysy joq qaryz bolýy tıis. Buǵan qosa, ony atalmysh zań aıasynda elimizde qurylatyn servıstik kompanıalarǵa senimgerlik basqarýǵa berý mindetteledi. Servıstik ınstıtýt óz kezeginde strestik aktıvterdiń ótimdi naryǵyn qurý úshin qajetti jaǵdaı jasaıdy.
"Servıstik kompanıalardyń fýnksıalaryn bankterdiń osy strestik aktıvteridi basqarý jóninde qurylǵan uıymdary jáne kolektorlyq agenttikter endi osy fýnksıalardy atqaratyn bolady. Olarǵa joǵary talaptar qoıylady. Menshik kapıtaly boıynsha jáne jumys tájirıbesi boıynsha basqada talaptar qoıylady", - deıdi QR qarjy naryǵyn retteý jáne damytý Agenttiginiń Tóraǵasy Mádına Ábilqasymova.
Spıkerdiń aıtýynsha, bul qaryz alýshy quqyǵyn qorǵaýdyń qosymsha tetigin qamtamasyz etýge múmkindik beredi. Sebebi atalǵan uıymdar elimizdiń qarjy naryǵyn retteý jáne damytý agenttiginiń retteý quzyryna jatady. Agenttik belgilengen talaptarǵa sáıkes keletin servıstik kompanıalardyń tizilimin júrgizip, olar týraly aqparatty óziniń ınternet-resýrsynda ornalastyrady.