Jalpy, indet juqtyrǵandar sanynyń kóbeıýi 20 maýsymnan bastalǵan.
Densaýlyq saqtaý mınıstri Ajar Ǵınıat Qazaqstan Úkimetiniń otyrysynda eldegi epıdemıologıalyq ahýal týraly baıandady, dep habarlaıdy Almaty-akshamy.kz
Densaýlyq saqtaý mınıstriniń aıtýynsha, 20 maýsymnan bastap respýblıka boıynsha KVI juqtyrý kórsetkishi óse bastaǵan. Keıingi eki aptada vırýs juqtyrǵandar sany 3,2 esege ósti.
«Keıingi táýlikte KVI-diń oń nátıjesimen 2021 jaǵdaı, KVI-diń teris nátıjesimen 1 jaǵdaı tirkeldi, ólim-jitim tirkelgen joq. Baǵalaý matrısasyna sáıkes, Nur-Sultan qalasy "sary" aımaqta, Qazaqstan Respýblıkasy jáne qalǵan óńirler "jasyl" aımaqta tur. Qazir ınfeksıalyq tósek-orynmen qamtý 30 paıyz, reanımasıalyq tósek-orynmen qamtý 7 paıyz. Qazir 5 mıllıonnan asa adam revaksınalaýdan ótti (revaksınalaýǵa 7 mıllıon 430 myń adam jatady), bul tıisti kontıngenttiń 68 paıyzy», - dedi Densaýlyq saqtaý mınıstri.
Sonymen qatar, Úkimet otyrysynda Premer-Mınıstr Álıhan Smaıylov koronavırýs ınfeksıasyn juqtyrýdyń aldyn alý sharalaryn saqtap, Densaýlyq saqtaý mınıstrligine jaǵdaıdy qatań baqylaýda ustaýyn talap etti.
«Jalpy, koronavırýs ınfeksıasyn juqtyrýdyń, ásirese, elordada jáne Qaraǵandy oblysynda kóbeıgenin kórip otyrmyz. Kún saıyn respýblıka boıynsha 3 myńǵa deıin jaǵdaı tirkeledi. Bul - óte joǵary kórsetkish. Shekteý sharalarynyń saqtalýyn qamtamasyz etý kerek. Maska taǵý, áleýmettik qashyqtyqty saqtaý sıaqty aldyn alýdyń negizgi sharalary qatań saqtalýy kerek. Vaksınalaý men revaksınalaýdyń tómen qarqyny epıdemıologıa jaǵdaıynyń kúrt nasharlaýyna alyp keledi. Sondyqtan ákimdikterge halyqty vaksınalaý jáne revaksınalaý jumystaryn jandandyrýdy tapsyramyn», - dedi Premer-Mınıstr Álıhan Smaıylov.