Koronavırýs pandemıasy aıaqtaldy.
Álem boıynsha koronavırýs pandemıasy aıaqtaldy. COVID-19 vırýsymen úsh jyldan astam kúres júrdi. Qazaqstan indetpen qalaı kúresti? Densaýlyq saqtaý mınıstrligi qorytyndy shyǵardy, dep habarlaıdy Almaty-akshamy.kz.
«Qazaqstanda pandemıa jarıalanǵan alǵashqy kúnnen bastap vedomstvoaralyq komısıa qurylyp, onda 2 myńnan astam jedel jáne utymdy sheshimder qabyldandy. Komısıa halyqtyń densaýlyǵyn COVID-19-dan saqtaý men qorǵaý, memlekettik organdardyń ózara is-qımyly, medısınalyq uıymdardyń ınfraqurylymyn nyǵaıtýǵa qatysty sheshimder qabyldady. Sonymen qatar dárilik zattardy, ımmýnobıologıalyq preparattardy, medısınalyq qural-jabdyqty, jeke qorǵaný quraldaryn satyp alý, eldegi jáne álemdegi epıdemıologıalyq jaǵdaıdy eskere otyryp, karantın talaptaryn kúsheıtý jáne álsiretý boıynsha sheshimder qabyldady», - delingen mınıstrlik habarlamasynda.
Odan bólek, pandemıa bastalǵanda mınıstrlik jáne barlyq óńir ákimdikteri janynan respýblıkalyq jáne jedel shtabtar quryldy. Olar kún saıyn koronavırýs ınfeksıasyna qarsy is-qımyl jónindegi medısınalyq uıymdardyń jumysyn úılestirdi.
«Pandemıa kezeńinde elimizdiń bas memlekettik sanıtar dárigeri COVID-19-ben kúreste profılaktıkalyq jáne epıdemıaǵa qarsy sharalar boıynsha 83 qaýly qabyldady. Jańa qaýly koronavırýs ınfeksıasynyń jańa nusqalarynyń paıda bolýyn jáne vırýstyń qasıeti týraly tájirıbeni eskere otyryp, ózektendirilip otyrdy. Ýaqtyly medısınalyq kómek kórsetý úshin qalalarda 16 modýldik aýrýhana salyndy jáne 3 ınfeksıalyq aýrýhana qaıta jańartyldy, sondaı-aq 63 ambýlatorıalyq-emhanalyq uıym paıdalanýǵa berildi», - deıdi vedomstvodan.
Aqparatta aıtylǵandaı, koronavırýs indeti kúsheıgen kezde úıge baryp medısınalyq kómek kórsetetin 3054 kóshpeli mobıldi brıgada jumysyn bastady.
«Psıhoemosıonaldyq júktemeni, qaýipterdi eskere otyryp, medısına kadrlaryn áleýmettik qoldaýdy qamtamasyz etý maqsatynda medısına qyzmetkerlerine ústemeaqy tóleý boıynsha sharalar qabyldandy. Pandemıa kezinde 57 myń medısına qyzmetkeri shamamen 285 mlrd teńge kóleminde tólemder aldy. Otandyq densaýlyq saqtaý júıesi resýrstarynyń, medısına qyzmetkerleriniń qajyrly eńbeginiń jáne KVI boıynsha profılaktıkalyq jáne epıdemıaǵa qarsy is-sharalardy ýaqtyly júrgizýdiń arqasynda ólimge ákeletin ınfeksıanyń taralýyn toqtatýǵa qol jetkizildi», - dep tolyqtyrady vedomstvo.
Sondaı-aq Densaýlyq saqtaý mınıstrligi koronavırýsty juqtyrý, odan bolǵan ólim-jitim jóninde statısıkany usyndy.
Elimizde 2020 jylǵy 13 naýryz ben 2023 jylǵy 5 mamyr aralyǵynda koronavırýs ınfeksıasynyń 1 411 883 jaǵdaıy tirkeldi. Pandemıa 13 848 qazaqstandyqtyń ómirin qıdy. Odan basqa, 2020 jylǵy 1 tamyz ben 2023 jylǵy 5 mamyr aralyǵynda koronavırýs belgileri bar pnevmonıanyń 91 027 jaǵdaıy tirkeldi, saldarynan 5413 adam qaıtys boldy.