Jaýyngerler arasynda psıhologıalyq saýalnama men áleýmettik zertteý jumystaryn júrgizýi kerek
Áskerı bólimderde álimjettik joıylmaı tur. Aıdyń kúnniń amanynda sarbazdardyń biri arbaǵa tańylsa, ózgesi tabytpen oralyp jatyr, dep habarlaıdy Almaty-akshamy.kz «Habar 24» telarnasyna silteme jasap.
Resmı derekterge súıensek, sońǵy 10 jylda 220 áskerı qyzmetker óz-ózine qol salǵan. Al osy máselege qatysty tilshilerimizdiń Qorǵanys mınıstrligine bir apta buryn joldaǵan saýalyna áli jaýap kelgen joq. Jyl saıyn elimizde 200 myńnan astam jigit áskerge shaqyrylady. Onyń tek tórtten biri sarbaz atanady, Osyǵan qarap jaýynger bolýdan jaltaryp júrgenderdiń qatary tym kóp ekenin uǵamyz. 30 myńnan astam adam ár túrli sebep-syltaýmen boı tasalap keledi. Densaýlyǵynda kinárat bolmasa, olardyń bul áreketin qalaı túsinýge bolady? Bul saýalǵa ata-analardyń óz jaýaby bar sıaqty.
Beıbit kezde belgisiz jaǵdaıda jas jigitterdiń opat bolyp jatqany ókinishti. Byltyr jazda «Oralda kúzette turǵan sarbaz óz-ózine qol saldy» degen aqparatty estidik. Rasymen sýısıd bola ma, joq pa belgisiz. Osydan týra eki apta buryn qatardaǵy jaýynger Álibek Qalbaı Otardaǵy áskerı qalashyqta qaıtys boldy. Onyń ólimi boıynsha kúdikti sarbaz ustalyp, tergeý jumystary júrip jatqanyn aıttyq.
«Zań boıynsha qazirgi otbasyna tólemaqy bar. 500 AEK jáne eskertkish-qulpytas qoıý úshin 80 AEK. Sondaı-aq jeke quramnyń atynan da kómek kórsetildi. Aqshalaı da, basqalaı da kómek kórsetilip jatyr»,-deıdi QR QK bas shtaby bastyǵynyń orynbasary Serik Boranbaev.
Áskerı sarapshy Ermek Seıitbattalovtyń aıtýynsha, áskerdegi álimjettik bos ýaqyttyń kóptiginen paıda bolady. Munyń aldyn alý úshin sarbazdarǵa beriletin úzilis merzimin qysqartý kerek. Bar nazaryn tek áskerı daıyndyqqa aýdarý qajet, deıdi otstavkadaǵy polkovnık.
«Áskerge kelgen jigitterge basynan bastap qatty talap qoıý kerek. Sonan keıin olardy birden jaýyngerlik daıarlyqqa, óte tyǵyz sharalarǵa qoıý kerek. Sonda olardyń basqa dúnıelerge bara almaıdy, ýaqyt taba almaıdy jáne bar nazary tek jaýyngerlik daıarlyqqa aýdarylady», -dedi áskerı sarapshy Ermek Seıitbattalov.
Álimjettik kóbeıse, áskerı bólim shaıqas alańynda jeńiske jete almaıdy deıdi Ermek Seıitbattalov. Sarapshy Rýstam Býrnashev ta bul pikirmen kelisedi.
«Bizdiń sarbazdar arasynda óńirshildik bar ma, joq pa bilmedim. Biraq álimjettik deńgeıi joǵary sanalatyn kez kelgen áskerı bólimniń shaıqas alańyndaǵy áleýeti álsiz degen túsinik bar. Bul bir tarıhı faktilerge negizdelgen álemdik tájirıbede bar ýaqıǵa bolsa tań qalmaımyn. Máselen, Izraıl men Shveısarıa áskerinde ishki tártip erejesi qatań saqtalady. Ol jaqta jaýyngerlik mindetten tys áreketke barý kórsetkishi óte tómen. Biraq áskerı nátıjesi joǵary»,-deıdi áskerı sarapshy Rýstam Býrnashev.
Rýstam Býrnashevtiń sózine súıensek, áskerdegi álektiń jaı-japsaryn anyqtaý úshin Qorǵanys mınıstrligi jaýyngerler arasynda psıhologıalyq saýalnama men áleýmettik zertteý jumystaryn júrgizýi kerek. Tek sol kezde ketken kem-ketik saldaryn joıýǵa bolady, deıdi maman.