Elimizde «Qazaqstandyq otbasylar-2022» ulttyq baıandamasy tanystyryldy, dep habarlaıdy Almaty-akshamy.kz.
Ortalyq komýnıkasıalar qyzmeti alańynda ótken baspasóz konferensıasynda Aqparat jáne qoǵamdyq damý mınıstrligi janyndaǵy «Qazaqstandyq qoǵamdyq damý ınstıtýty» KeAQ basqarma tóraǵasy Nurbek Matjanı «Qazaqstandyq otbasylar-2022» ulttyq baıandamasyn tanystyrdy. Sózinshe, mundaı zertteý buǵan deıin 2020 jyly júrgizilgen.
Baıandamanyń maqsaty – otbasy ınstıtýty salasyndaǵy negizgi problemalar men trendterdi anyqtaý jáne elimizdegi otbasy saıasatyn jetildirý úshin praktıkalyq usynystar ázirleý.
Mundaı zertteýler, onyń ishinde derekter otbasy ınstıtýtynda bolyp jatqan ózgerister men olarǵa obektıvti túrde berilgen ǵylymı saraptama qoǵam úshin mańyzdy. Baıandama negizgi 4 taraýdan turady. Olardyń árqaısysynda birneshe bólim bar, - dep aıtty Nurbek Matjanı.
Birinshi taraýda elimizdegi otbasy saıasatyn júzege asyrý prosesine taldaý jasalyp, onyń zańnamalyq jáne ınstıtýsıonaldyq aspektileri zertteldi. Osy turǵyda Ulttyq baıandamaǵa engizilgen qıyn jaǵdaıdaǵy otbasylarǵa psıhologıalyq, áleýmettik, quqyqtyq kómek kórsetýge baǵyttalǵan pılottyq joba, otbasyn qoldaý ortalyqtarynyń qyzmetine sholýdy erekshe atap ótken jón.
Bul baǵyt áleýmettik az qamtylǵan otbasylardy memlekettik-áleýmettik qoldaý máselelerin qarastyrǵan baıandamanyń ekinshi taraýynda tolyǵyraq qamtylǵan. Zertteýde osy saladaǵy ózekti máseleler, onyń ishinde tabys kózi, jumyssyzdyq, áleýmettik beıimdelý, ataýly áleýmettik kómek alýdaǵy búrokratıa sıaqty máseleler anyqtalyp, ony sheshý joldary boıynsha usynystar berildi. Al úshinshi taraýy otbasylardaǵy ata-ana áleýetin qalyptastyrý jáne bala tárbıesiniń erekshelikterin zertteýge arnalǵan, - dep túsindirdi ınstıtýt tóraǵasy.
Sonymen qatar Matjanı qazaqstandyqtardyń reprodýktıvti densaýlyǵy týraly statısıkalyq derekterge nazar aýdarý mańyzdy ekenin aıtyp, qujattaǵy jańalyqqa toqtalyp ótti.
Ulttyq baıandamanyń tórtinshi taraýynda alǵash ret sybaılas jemqorlyqtyń aldyn alý jáne oǵan qarsy kúreske áıelder men Otbasy ınstıtýtynyń yqpaly týraly másele qarastyrylady. Sondaı-aq alǵash ret Ákeler ınstıtýty jan-jaqty qarastyryldy, - dep atap ótti ol.